Филков нагласи дека односите во владината коалиција се одлични. Тој оцени дека како ќе се приближуваме кон локалните избори така изборниот фолклор ќе станува поинтересен
Не планирам да се повлечам од министерската функција ниту, пак, да се кандидирам за градоначалник на Општина Карпош, рече денеска министерот за правда Игор Филков во одговор на новинарски прашања.
„Апсолутно не. Како ќе се приближуваме кон локалните избори, нашиот фолклор ќе биде уште поинтересен. Не планирам да се повлечам од оваа функција, планирам да продолжувам со реформите. Ниту планирам да се кандидирам за градоначалник на Општина Карпош“,
рече министерот за правда.
Филков нагласи дека односите во владината коалиција се одлични.
„Би се задржал само на овие коментари коишто се дел од демократијата. Верувам дека и во иднина ќе следуваат уште многу, како што ќе се приближуваме кон предизборието. А односите во коалицијата се одлични, подобри и не можат да бидат“,
потенцира Филков.
Минатата недела пратеникот и функционер во ВМРО-ДПМНЕ, Антонијо Милошоски, и министерот за правда Игор Филков кој доаѓа од ЗНАМ си упатија меѓусебни дискредитации.
Милошоски, оценувајќи ја работата на Филков, рече дека тој има слаби перформанси во однос на обврските коишто ги има преземено за реформите во правосудството.
На забелешките на Милошоски, со остра реакција на социјалните мрежи излезе прозваниот Филков, кој за пратеникот на ВМРО-ДПМНЕ напиша дека уште откако се повлекол од функцијата министер за надворешни работи, како пратеник, активно учествувал во креирањето на канцерогениот правосуден систем, а, како што наведе, бил вклучен и во донесувањето на штетните измени во Кривичниот законик во 2023 година, со што се спасил од одговорност за кривичното дело „Моќник“.
Во однос на обвинувањата од Милошоски за доцнењето на реформските закони во правосудството, Филков наведе дека пратеникот „очигледно е неинформиран и изолиран од партијата“.
Кавгата меѓу Милошоски и Филков, премиерот Христијан Мицкоски ја припиша на „лошиот ден“, кој, како што рече, верува дека и на двајцата им завршил.
„Премиерот тоа го дефинира како лош ден, а јас би го дефинирал како лоши и некоректни изјави, но тоа се лични ставови и видувања, а не официјални на партиите“,
реагираше претседателот на Движењето За наша Македонија (ЗНАМ), Максим Димитриевски.
Тој вчера на Фејсбук посочи дека владиното мнозинство е стабилно и дека нема преговори за размена на ресори со ВМРО-ДПМНЕ.
Димитриевски информираше дека Движењето ЗНАМ- За Наша Македонија на локалните избори ќе настапи со свои кандидатски листи за советници.
„Во однос на градоначалничките места се преговара со коалициониот партнер ВМРО-ДПМНЕ за истакнување на кандидати на ЗНАМ или на ВМРО-ДПМНЕ по одредени општини, каде поддршката од двете партии ќе ја добие кандидатот на онаа што ќе биде истакнат за градоначалник уште во првиот круг од изборите. Што се однесува до Куманово, Движењето ЗНАМ – За наша Македонија ќе има свој кандидат за градоначалник. Партиските тела и органи во Куманово ќе одлучат кој ќе ја има честа да учествува во трката за тоа место“,
напиша Димитриевски.