Се работи за измените на КЗ кои по доаѓањето на функцијата тој ги најави како метод за анулирање на настанатата состојба од минатогодишните контроверзни измени на КЗ
Министерот за правда Игор Филков најави дека во периодот што следува ќе се организираат јавни дебати во чиј фокус ќе бидат измените на Кривичниот законик (КЗ), кои по доаѓањето на функцијата тој ги најави како метод за анулирање на настанатата состојба од минатогодишните контроверзни измени на КЗ.
„Сè уште се работи на барање на соодветно решение. Не е дискутабилно она што сакаме да го направиме и немаме дилеми околу тоа. Она за што може да се разговара е дека Законот не дозволува ретроактивна примена. Тука го бараме најдоброто решение за она што било сторено, како најдобро да се одговара за тоа“,
изјави министерот Филков.
Додаде дека нема да се избрзува со измените, затоа што треба да се донесе најдоброто можно решение.
Освен за измените на КЗ, Филков најави и иницирање широки консултативни дебати за измени на законите од сферата на нотаријатот, извршувањето, медијацијата, а особено за законите за Судскиот совет и за Јавното обвинителство за да се дојде до решенија кои, како што рече, ќе гарантираат независност на овие институции и тие да бидат ослободени од политичко мешање и да бидат во служба на правдата.