На сите ни е тешко, но мора да се држиме до превентивните мерки – ситуацијата се влошува поради непочитување, вели министерот за здравство
Во тек се анализи за причините што доведе до зголемување на бројот на заразени и починати од ковид-19. На почетокот на следната недела ќе знаеме на што се должи тоа и дали треба нешто дополнително да се преземе, изјави денеска министерот за здравство Венко Филипче.
Одговарајќи на новинарско прашање, за причините зошто има зголемен број заразени и смртност како последица на ковид последниве денови, повеќе од времето кога беше донесена одлуката за воведување рестриктивни мерки, Филипче рече дека се прави анализа и призна дека последните три дена состојбата е влошена.
„Точно е дека последните денови е зголемен бројот на починати како последица на ковид-19, и тоа последиве три дена. Претходно процентот беше 6,5, сега е некаде 8. Правиме анализа, не сакаме да дозволиме да имаме преполни болници. Таа анализа ќе заврши на почетокот на следната недела и ќе можеме да кажеме на што се должи и дали треба дополнително нешто да се преземе. Онаму каде што има пораст, факт е дека превентивните мерки не се почитуваа. На сите ни е тешко, имаме деца, но сите сме во ова, цел свет, само со почитување на превентивните мерки може да излеземе од кризата“,
рече Филипче.
Тој повтори дека се работи за исклучително тешка болест, со тешка клиничка слика, која за жал одзема многу млади човечки животи. Тоа, според Филипче главно се лица со други заболувања, што ја влошува состојбата и се намалува шансата за оздравување.
Неофицијално, тој рече дека пет лица во изминатите 24 часа, за жал, ја изгубиле битката со болеста.