На онлајн прес-конференција од својот дом, министерот за здравство оцени дека се движиме кон пикот на заразата со коронавирусот и дека затоа е очекувано дека ќе се зголемува бројот на новзаболени на дневна основа
Министерот за здравство Венко Филипче, на вечерашната онлајн прес-конференција, неколку часа откако соопшти дека ќе биде во изолација, рече дека Владата предвидела сценарио какво што произлезе од посетата на премиерот Оливер Спасовски и на тројца министри во Куманово. Филипче рече дека е очекувано и зголемувањето на бројките на новозаболени од ковид-19 на дневна основа, така што денеска беше постигнат неславен рекорд со 107 нови случаи.
Како што оцени министерот за здравство, влегуваме во најкритичната фаза и се движиме кон пикот на епидемијата, така што очекувано е дека ќе се зголемува стапката на заболени, што потоа се очекува да почне да опаѓа.
„Големата бројка на дијагностицирани со коронавирус што ја имаме денеска не треба да изненадува. Тоа е бројка што ја очекувавме, имајќи предвид дека влегуваме во пикот во неделите што се пред нас. Ова е уште еден сигнал дека треба да се почитуваат сите мерки и препораки за да се спречи натамошно ширање на вирусот“,
рече Филипче на прес-конференција што ја одржа онлајн од својот дом.
Тој повтори дека очекува бројката на заразени од коронавирусот да стигне до околу 2,5 илјади, ама рече дека не може да се прогнозира по колку нови случаи би имало на дневна основа, со оглед на тоа што денеска првпат имаше и повеќе од сто новозаразени. Досега, како што тече, трендот е позитивни да бидат од 10 до 20 проценти од направените тестови во текот на еден ден.
Во однос на велигденските празници, Филипче рече дека категорично стои на ставот дека не смее да има групирања, посочувајќи дека во таа насока се и мерките на владата кои не дозволуваат движење на повеќе од две лица.
„Бројот на новодијагностицирани пациенти очекувано расте. Но, не смее да дозволиме овој број дополнително да го оптовариме и да дадеме шанса за две недели отсега, заради овие групирања, да се јават нови заболени. Какви било собирања се огромен ризик“,
рече Филипче.