Вакцините се тие кои ќе помогнат да се вратиме во нормалниот живот, тие ги спречуваат тешки форми на болеста и ризикот од смртен исход, вели министерот за здравство
Мотивација кај граѓаните треба да биде фактот што вакцината за 20 пати го намалува ризикот од смртен исход од ковид, вели министерот за здравство, Венко Филипче.
„Огромен процент од новодијагностицирани пациенти, 80 и неколку проценти и од тие коишто се во болница се невакцинирани, што значи дека тоа е проблемот не само кај нас, туку насекаде. Разговараме и со колегите во регионот, секаде болниците се оптеретени со невакцинирани пациенти“,
рече Филипче денеска во Бутел, каде изврши увид на градежните работи на новата амбуланта.
Тој вели дека сосема е веројатно дека ќе има нови мутации на вирусот, но вакцината е таа која штити и го намалува ризикот од хоспитализација и смртен исход.
„И тоа е начин ние да ги вратиме животите во нормала. За жал, гледаме дека имаме граѓани кои сè уште се невакцинирани. Апелирам да се вакцинираат, тоа е начинот и да се заштити здравјето, а ние да го штитиме системот од понатамошни бранови и оптеретувања“,
рече Филипче.