Измените на Законот за заштита на населението од заразни болести не се најдоа на дневен ред на денешната седница бидејќи ВМРО-ДПМНЕ побарала време за подетално да ги разгледа
Мерките за заштита од ковид-19 кои се во Собранието мора итно да се донесат. Пратениците да покажат одговорност и што поскоро едногласно да се изгласаат двата пакетa на мерки за заштита на населението и спречување на понатамошно ширење на вирусот, порача министерот за здравство Венко Филипче.
„Барам сите сложно да испратиме порака на единство околу важноста за почитување на мерките. Тие се целосно издржани, базирани на анализите на Институтот за јавно здравје и на меѓународните искуства. Исти или слични мерки во моментов веќе се во сила во сите европски држави. Нема повеќе време за одлагање, состојбата со вирусот е сериозна“,
напиша Филипче на Фејсбук.
Филипче додава дека и постојните мерки и препораки се во интерес на заштита на здравјето и мора доследно да се почитуваат.
„Болниците се полнат и сите треба да сме свесни дека од секој од нас зависи како ќе ја надминеме состојбата. Следуваат ризичните есенски и зимски месеци и барам високо ниво на свест и почит кон трудот на здравствените работници“,
порача Филипче.
По барање на опозицијата, на денешната собраниска седница не се најдоа измените и дополнувањата на Законот за заштита на населението од заразни болести, по скратена постапка, кои се однесуваат на нови мерки за заштита од коронавирусот Од ВМРО-ДПМНЕ потврдуваат дека побарале да ги разгледаат подетално предлозите и да дадат свои предлози.
Со законските измени се предвидува носење маски на отворено, ограничување на групирање по 22 часот и ограничување на семејните собири.
Се очекува Собранието да расправа за Законот на следната собраниска седница, на 27 октомври, кога се очекува на работа да се вратат и двајцата пратеници од мнозинството позитивни на ковид-19, Лазе Танески и Исмаил Јахоски.