Министерот за здравство, Венко Филипче, го осуди нападот кон докторката во болницата „8 Септември“ од страна на роднини на почината пациентка со ковид-19.
„Ова е чин на крајно непочитување на сите здравствени работници кои повеќе од 4 месеци деноноќно се борат за секој човечки живот. Ова е дискредитација на нивната работа, нивниот труд и жртва, ризикот на кој се изложени и одрекувањата. Овие луѓе со месеци ги немаат видено своите семејства, ги немаат прегрнато своите најблиски, немаат ден одмор и оддишка од напорната работа. Најостро го осудувам овој инцидент. Колегите кои се борат со преку 100 пациенти сместени во болницата заслужуваат само поддршка и разбирање, а не закани. Цврсто сум уверен дека тие постапиле професионално и согласно протоколите и ги повикувам надлежните да го истражат случајот и да постапат соодветно“,
вели министерот во реакцијата на социјалните мрежи.
Во инцидентот, потсетува тој, интервенираше полицијата која приведе неколку члена од семејството на починатата. Тие се обиделе насилно да го земат телото без да го спроведат соодветниот протокол за лица починати од ковид-19.
Во полициската станица во Гази Баба вечерва се приведени 6 лица, а еден од нив бил позитивен на ковид-19, па бил спроведен со посебен протокол.
*Поврзани вести:
Шестмина приведени по инцидентот во „8 Септември“, еден од нив е позитивен на ковид-19