Тој повторно побара од премиерот да каже кои се земјите кои го поддржуваат ваквиот предлог бидејќи, како што додаде, во ЕУ одлуките се носат со консензус
Лидерот на опозицискиот СДСМ, Венко Филипче, денеска изјави оти очекуваат од премиерот Христијан Мицкоски да ја обезбеди најавената поддршка во Европската Унија околу предлогот уставните измени да бидат со одложено дејство, и ако тоа се случи, ќе добијат апсолутна поддршка од опозиската партија.
Филипче ова го кажа за време на денешниот традиционален собир на партијата во прилепското село Селце по повод 11 Октормври, одговарајќи на новинарско прашање дали за СДСМ е прифатлив предлогот уставните измени да бидат со одложено дејство.
Сепак тој повторно побара од премиерот Мицкоски да каже кои се земјите кои го поддржуваат ваквиот предлог бидејќи, како што додаде, во ЕУ одлуките се носат со консензус.
„Премиерот најавува дека има некаква поддршка од некои земји членки во ЕУ, не од сите, а таму знаеме дека одлуките се носат со консензус, дека наводно за нив е прифатливо да има уставни промени со одложено дејство. Ние упативме отворен апел, повик, да има собраниска седница на која премиерот ќе каже кои се тие земји кои нѐ поддржуваат со тој негов предлог, зошто Собранието е тоа кое носи одлуки и Собранието е место каде се креираат такви политики. Во таа смисла, очекуваме премиерот да каже кои се тие земји, која е таа поддршка, меѓутоа истовремено имаме предвид двајца луѓе кои го демантираат премиерот во тие најави. Прво, неговиот министер за евроинтеграции, Муртезани, кој кажува дека таква работа е неприфатлива за Европската Унија и амбасадорот на ЕУ во нашата земја, господинот Рокас, кој го кажа истото. И, да бидам конкретен, очекуваме премиерот да ја обезбеди таа поддршка, дека таму (во Брисел) ќе прифатат да има уставни измени со одложено дејство и кога тој ќе го обезбеди тоа, ние апсолутно тоа ќе го поддржиме“,
изјави Филипче.
Од друга страна, претседателот на СДСМ рече дека владејачката партија ВМРО-ДПМНЕ не само што не ја подобрила преговарачката позиција, како што се најавуваше, туку ситуацијата се влошува, а краен епилог е одвојувањето на Албанија од Македонија на патот во ЕУ.
„Ние, за жал, во изминатиов период не гледаме ништо конкретно, никаков обид да ја подобрат нашата преговарачка позиција. Напротив, гледаме само влошување на ситуацијата, влошување на билатералните односи, прво со Грција, а потоа и со Бугарија и, за жал, одлука да ние се одвоиме на патот за Европската Унија од Албанија поради тоа што, очигледно, во нас не гледаат никаков напредок во ЕУ. Притоа, меѓувладината седница која сега ќе ја одржи Албанија ќе се случи на 15 октомври, за само два дена. Таква седница на истиот датум ќе имавме и ние да имавме малку поодговорна власт“,
изјави Филипче.
Претходно тој имаше обраќање пред насобраните граѓани, поддржувачи и членови на СДСМ, во кое упати низа критики кон владејчката ВМРО-ДПМНЕ и нејзиниот претседател и премиер на Владата, Христијан Мицкоски, за кои рече дека ги изневериле граѓаните со своите лаги и манипулации во предизборието.
„Мицкоски и ВМРО-ДПМНЕ станаа заложници на своите лажни ветувања, а со тоа ја држат во заложништво и Македонија. Ветуваа дека ќе обезбедат подобри позиции во преговорите со Европската Унија. Свесни дека лажеле, свесни дека не можат ништо да испорачаат сега се заглавени како возот в снег. Ниту напред ниту назад. Ги слушавме како велеа дека ќе ги поништуваат меѓународните договори, а пред некој ден Мицкоски рече дека Преспанскиот договор бил добар и требало да биде модел за преговорите со Европската Унија. Замислете, Мицкоски, кој својата политичка кариера ја изгради на протести против Преспанскиот договор сега го посочува како успех. Кога им одговараше, манипулираа со емоциите на граѓаните, не размислувајќи дека еден ден ќе мора да преземат одговорност“,
рече Филипче во своето обраќање.
Лидерот на СДСМ со критика и загриженост се осврна на, како што кажа, последните изјави на премиерот околу реформите во правосудството.
„Замислете, вели дека ако резултатите од истрагите во судството не бидат според неговите очекувања, ќе предложел нови луѓе на сите позиции во правосудството. Тоа значи дека веќе размислува да го партизира судството, дека размислува како да го одземе тоа што со многу мака го стекнавме – слободата и демократијата. За само 100 дена Мицкоски ги открива плановите за целосна контрола во правосудството. Ова не е реформска влада. Ова е власта која сака да ја врати Македонија назад во времето на репресијата“,
кажа лидерот на СДСМ.
Коментирајќи ги повиците на власта за конструктивност од опозицијата, Филипче во своето обараќање рече дека ќе дадат поддршка за секое решение или подобра позиција која ќе ја договори Владата, но нема да бидат параван за нивните пропаднати политики.
„Сакам јасно да им порачам, СДСМ не е ВМРО-ДПМНЕ и нема да ја кочи иднината на земјата и на граѓаните за своја политичка корист. Но, едно да биде јасно, СДСМ нема да наседне на нивните манипулации. Ќе дадеме поддршка за секое решение или подобра позиција која ќе ја договори Владата, но само ако тие решенија се реални и остварливи. Ако очекуваат дека СДСМ наивно ќе даде поддршка на идеи кои значат понатамошни блокади, решенија во кои никој не верува освен тие самите во ‘белата палата’, тогаш се излажале. Ние нема да бидеме параван за нивните пропаднати политики. Нека покажат лидерство, нека покажат храброст и најважно од сè, нека покажат искреност, нека понудат реални решенија околу кои можеме да се обединиме – ако не, нема да бидеме соучесници во нивната пропаст“,
порача лидерот на СДСМ.