Обвинителката Фатиме Фетаи, која го застапуваше СЈО во предметот „Титаник 2“, денеска рече дека не може да ја коментира одлуката на Апелација со која се укинува првостепената пресуда бидејќи сè уште не ја добила, но оцени дека соопштението од второстепениот суд е прилично напаѓачко.
„Сè уште ја немаме добиено одлуката, меѓутоа можам да го коментирам само соопштението, прилично е напаѓачко, а се знае дека нападот е најдобра одбрана“, изјави Фетаи одговарајќи на новинарско прашање пред да влезе утрово во Кривичниот суд.
Пред два дена Апелација соопшти дека на 4 минатиот месец на јавна седница донела одлука за укинување на првостепената пресуда со која Бедредин Ибраими беше осуден на 4 години и 6 месеци затвор, Сашо Мијалков на 3 години затвор, Мендух Тачи на 3 години и 2 месеци, а членовите на ова тело од редовите на ВМРО-ДПМНЕ, Анета Стефановска, Влатко Сајковски и Сашо Срцев, добија по три години затвор.
Предметот е вратен пред Основниот кривичен суд – Скопје на повторно постапување и одлучување поради суштествени повреди на постапката поради кои првостепената пресуда се смета за незаконска и неправилна.
„При разгледување на пресудата, Апелацискиот суд констатираше дека првостепениот суд при постапувањето по овој предмет сторил многубројни суштествени повреди на постапката од апсолутен карактер, поради кои одлуката е во целост незаконита и неправилна. Во таа насока, жалбениот совет констатираше дека утврдените факти што го чинат законското обележје на кривичните дела што им се ставаат на товар на обвинетите во целост противречат на содржината на изведените докази, а воедно првостепениот суд неосновано се впуштил и утврдувал факти за постоење кривична одговорност за лица кои немаат својство на обвинети во конкретната постапка“, се вели во соопштението од Апелација.
