Пратеникот од владејачкото мнозинство Ферид Мухиќ на вчерашната седница за избор на нови министри гласал различно за секого од понудените кандидати.
Увидот во листинзите од синоќешното изјаснување на пратениците открива дека Мухиќ воопшто не гласал за новиот министер и негов довчерашен колега во Собранието – Горан Милевски. За Трајан Димковски гласал „за“, а за Садула Дураку го притиснал копчето „против“. Бил воздржан за Насер Нуредини и Хусни Исмаили.
Во изјава за „360 Степени“, пратеникот Мухиќ вели дека зборувал на телефон, па задоцнил да гласа за Горан Милевски.
„Многу ми е криво, бидејќи навистина сакав да го поддржам Милевски“, ни рече Мухиќ.
Гласал „за“ Трајан Димковски да биде министер за земјоделство бидејќи, како што вели, лично го познава и знае каков капацитет поседува.
„Новиот министер за култура не го познавам, иако кажаа дека е доктор, подрачјето на културата е многу сложено, бара поголема фамилијаризација, познавање на проблемите и бев воздржан за него и за Насер Нуредини. За Дураку гласав против поради министерството каде што ќе стапи на должност. Зошто нема ниедно министерство за Турците, Ромите, Србите, Бошњаците, Египќаните… Нели концепот беше ,едно општество за сите’. Со ова министерство пак ќе имаме проблем на неинклузивност на заедниците“, го објасни Мухиќ своето синоќешно гласање.
И Али Ахмети на гласањето за владината реконстукција
Иако е реткост да се види во Собранието, лидерот на ДУИ вчера беше меѓу 109-темина присутни пратеници. Али Ахмети ги поддржа сите предлози на премиерот Зоран Заев за нови министри. И лидерот на Алтернатива, Африм Гаши, даде „за“ предлозите на Заев, меѓу кои е и кадарот на оваа партија – Хисни Исмаили за ресорот култура.
Претседателот на Алијансата за Албанците, Зијадин Села, гласал против предложените решенија, a Мендух Тачи од ДПА не присуствуваше на вчерашната седница. Празно остана и пратеничкото столче на Весел Мемеди од НДП, кој објави повлекување на неговата партија од власта поради одлуката на Заев да го реконструира министерот за локална самоуправа Сухејл Фазлиу.
Независните пратеници од ВМРО-ДПМНЕ следат, но не гласаат
Пратениците од ВМРО-ДПМНЕ кои ги поддржаа уставните измени за името на државата и беа исклучени од матичната партија, вчера не гласале за предлозите на Заев за нови министри. Сашо Василевски, Љубен Арнаудов, Емилија Александрова, Елизабета Канческа-Милевска и Зекир Рамчиловиќ, иако регистрирани за присутни, не стиснале ниедно од трите копчиња. На седницата била и Владанка Авировиќ од СПМ, но и таа не гласала за ниту еден од предлозите. Од „исклучените“ пратеници од ВМРО-ДПМНЕ при вчерашното изјаснување отсуствуваа Крсто Мукоски и Нола Исмајлоска–Старова.
Собранието вчера пред полноќ ги изгласа новите министри на предлог на премиерот Зоран Заев, по што тие дадоа свечена изјава.
*поврзана вест: Кои се министрите во новата влада?
*поврзана вест: Александра Цветкоска од СДСМ влегува во парламентот на местото на Горан Милевски