Лондонскиот весник посочува дека планот на ЕК предвидува дека темпото на преговорите ќе зависи од спроведување на реформите во земјите кандидати, при што во екстремен случај процесот може да биде ставен во мирување или суспендиран
Брисел подготвува план за промена на процедурата за преговорите за членство во ЕУ, кој се очекува да стане ново потенцијално бојно поле меѓу членките на Унијата околу тоа дали да се даде зелено светло за отпочнување на претпристапниот процес за Скопје и Тирана, оценува лондонски „Фајненшел Тајмс“.
Весникот, кој имал увид во планот, наведува дека тој ќе овозможи на појасни ставови околу тоа што членките на ЕУ очекуваат од кандидатите за членство, како и во врска со последиците со кои би се соочиле државите аспиранти во случај на исполнување или неисполнување на поставените барања.
„Фајненшел Тајмс“ оценува дека владата во земјава се соочува со „голем предизвик на изборите во април од страна евроскептичните противници, кои тврдат дека ЕУ ја предала земјата, иако таа ги исполнила сите поставени барања, вклучително и промена на нејзиното име со што се стави крај на долгогодишниот спор со Грција“.
Весникот пренесува и изјава на министерот за надворешни работи Никола Димитров, кој вели дека носењето одлука за почнување на преговори пред изборите во април, „во суштина ќе даде одговор на прашањето што сака Европа со Балканот“.
„Фајненшел Тајмс“ посочува дека планот на ЕК, кој треба да биде објавен оваа недела, предвидува дека темпото на преговорите ќе зависи од спроведувањето на реформите во земјите кандидати за членство, при што во екстремен случај преговарачкиот процес може да биде ставен во мирување или суспендиран, како и да има повторно отворање на веќе затворени поглавја.
Планот, исто така, нуди и подобри стимуланси за земјите кандидати за успешно работење, вклучително и зголемени финансиска помош и инвестиции и поблиска интеграција со политиката, пазарите и програмите на ЕУ во областите каде што е постигнат напредок, додава весникот.