Партијата на европските зелени денеска побара да не се попречува патот на Северна Македонија на утрешниот состанок на министрите за европски работи на ЕУ, јави МИА од Брисел.
Европските зелени, заедно со нивните партии членки во Бугарија и во Северна Македонија, изразуваат „силна поддршка“ за почетокот на преговори со Скопје и усвојувањето на преговарачката рамка „без одлагање“.
„Силната европска ориентација на Владата во Северна Македонија и докажаните напори на земјата за макотрпни реформи беа признаени од ЕУ во март 2020, ЕУ мора сега да одговори на очекувањата на граѓаните на Северна Македонија за европска иднина“,
велат Зелените во соопштението.
Тие потсетуваат дека ЕУ е изградена врз диверзитет и „богата културна историја на луѓето што ја сочинуваат“, како и врз „правото на секоја заедница за самоопределување и самоидентификација“ и дека дебатите помеѓу соседни држави треба да се решаваат билатерално, а не да се користат како изговори за блокирање на процесите на ниво на ЕУ.
Посочувајќи го самиот Договор за пријателство помеѓу Бугарија и Северна Македонија, во кој се изразува поддршка за европската перспектива на Скопје, Европските зелени на крајот констатираат дека крајно време е овие зборови да се претворат во дела.