„Европскиот фронт“ потпиша декларација за поддршка на заложбите на претседателскиот кандидат на ДУИ, Бујар Османи

Откако го слушнале образложението од Османи за заложбите, лидерите на „Европскиот фронт“ потпишаа Декларација за поддршка на, како што се вели во соопштението, „декалогот на европскиот претседател“

Лидерите на „Европскиот фронт“, кои се дел од коалицијата предводена од Демократската унија за интеграција (ДУИ), денеска ги добија 10-те ветувања за кои ќе се залага претседателскиот кандидат Бујар Османи. Откако го слушнале неговото образложение на заложбите, лидерите на „Европскиот фронт“ потпишаа Декларација за поддршка на, како што се вели во соопштението, „декалогот на европскиот претседател“.

Своите заложби од програмата, Османи ги презентираше пред лидерите на политичките партии кои се дел од „Европскиот фронт“, Али Ахмети од ДУИ, Мендух Тачи од ДПА, Зијадин Села од АА, Скендер Реџепи Зејд од Движење на народот, Аријанит Хоџа од Евроспката демокартска партија, Бејџан Иљас од Демократската партија на Турците на Македонија и Фатима Османовска од Унија на Ромите.

Османи при презентацијата ги наведе трите основни принципи на програмата од кои произлегуваат 10-те ветувања. Основните столбови се компасот на геостратешката ориентација на земјата, врзивното ткиво на етничките и политичките наративи, како и улогата креатор на државниот консензус.

Османи и официјално промовиран за претседателски кандидат на ДУИ: Предизвиците се големи, битно е да биде вистинскиот човек на вистинска функција

Претседателскиот кандидат Османи потоа ги образложи секое од десетте ветувања за кои рече дека ќе ги исполни ако биде избран за претседател на државата.

„Интеграција во ЕУ до 2030 година, избор на претседател преку Собранието со двојно мнозинство, партнерство и стратешки дијалог со САД, формирање на меѓународен одбор со САД, ЕУ и НАТО за сертификација на сите носители на јавни функции, зајакнување на Армијата во согласност со стандардите на НАТО, соодветно меѓународно етаблирање преку надворешната политика, задржување на младите во земјата, образование и иновации, како и зелена агенда“,

се заложбите кои ги презентираше Османи.

Лидерите на „Европскиот фронт“ денеска на средбата дале согласност за вклучување во Програмата на клучни прашања од стратешко значење за државата.

Под мотото „Дојде време за првиот претседател Албанец“, ДУИ в сабота ќе одржи промотивна конвенција за својот кандидат Бујар Османи

На промоцијата на Бујар Османи за претседателски кандидат, тој порача дека предизвиците се големи, но и можностите се големи, битно е да биде вистинскиот човек на вистинска функција. Османи вети дека со севкупниот дипломатски багаж ќе се бори за да се подобрат состојбите во земјата.