Во соопштението кое го испрати собраниската прес-служба во врска со деталите од средбата, се наведува дека соговорниците заеднички констатирале дека е потребно овој пратенички мандат да ги остави зад себе сите процеси од транзицијата и сите оправданија кои прават државата да тапка во место и едногласно, пред Европската Унија и светот, да ја потврди и реализира заедничката стратешка цел
Одблиску ги следиме реформите и процесите во Република Северна Македонија и очекуваме во 2023 година да се случат сите посакувани и потребни промени и напредок на државата кон ЕУ, но не заради европските интеграции, туку во насока на придобивките за граѓаните и државата.
Ова го изјавил европскиот пратеник Андреас Шидер за време на средбата со претседателот на македонското Собрание Талат Џафери на маргините на конференцијата „Поддршка на парламентарната демократија ширум светот: градење демократска отпорност“ која се одржа денеска во Европскиот парламент.
Во соопштението кое го испрати собраниската прес-служба во врска со деталите од средбата, се наведува дека соговорниците заеднички констатирале дека е потребно овој пратенички мандат да ги остави зад себе сите процеси од транзицијата и сите оправданија кои прават државата да тапка во место и едногласно, пред Европската Унија и светот, да ја потврди и реализира заедничката стратешка цел.
За време на средбата, Џафери го информирал европскиот пратеник за тековните процеси во Собранието, меѓу кои разгледување на Предлог-буџетот на државата за 2023 година, за временската рамка за негово усвојување, како и за приоритетните предлог закони кои што треба да се усвојат од страна на Собранието до крајот на оваа година.
„Дополнително, се наврати и на двете поднесени иницијативи за распишување на референдум, за политичкиот дијалог во Собранието, како и уставните измени кои што треба да се усвојат пред да започне отворањето на кластерите со ЕУ. Во однос на политичките настани и одржувањето на Жан Моне Дијалогот, претседателот Џафери нагласи дека очекува процесот за усвојување на новиот Деловник да се заврши во 2023 година зашто нов Деловник, ќе го ослободи Собранието од блокади и ќе го насочи законодавниот процес кон ефикасност и продуктивност“,
се додава во соопштението од собраниските прес-служби.
Претходно денеска, собранискиот спикер се обрати на Конференцијата на Европскиот парламент на тема „Креирање на парламентарна демократска култура преку дијалог и градење консензус“.
Тој во своето обраќање зборувал за дијалогот на парламентарните групи во рамки на Жан Моне процесот, посочувајќи дека „измените на Деловникот се важни зашто ќе ни овозможат да се фокусираме на суштинските прашања без при тоа да бидеме забавени од сите процедурални пречки кои се вистински предизвик за работата на Собранието“.
На конференцијата во ЕП, Џафери потенцирал дека Жан Моне процесот е долгорочен процес, кој може да трае и неколку години при што, се состои од неколку рунди на дијалог, секоја рунда е за едно одредено прашање или, пак, може да биде за неколку прашања и се одвива помеѓу пратениците од различните политички пратенички групи. Притоа, секој круг на дијалог има своја специфична цел, а сите рунди заедно имаат многу поширока, сеопфатна цел, а тоа е, како што рекол, визијата за градење култура на доверба и дијалог во Парламентите.