Истражувањето спроведено во шест земји на ЕУ покажува дека членството на Северна Македонија во ЕУ го поддржуваат 26 отсто, додека 27 отсто се против
Поддршката за пристапување е најмала за Косово и изнесува 20 отсто, додека 37 отсто се изјасниле дека земјата треба да стане дел од Унијата, за Албанија односот е 24 отсто „за“, 35 отсто „против“, Србија (25 отсто „за“, 35 отсто „против“) и Грузија (25 отсто „за“, 31 отсто „против“)
Европејците се генерално отворени кон идејата за приклучување на Украина во Европската Унија (ЕУ), и покрај трошоците и ризиците, но во најдобар случај нивното расположение е „млако“ кога станува збор за потенцијално проширување на Унијата со Грузија и земјите од Западен Балкан (меѓу кои е и Северна Македонија), покажува истражувањето на Европскиот совет за надворешни работи (ЕЦФР), пренесува „Гардијан“.
Европската комисија (ЕК), потсетува британскиот весник, минатиот месец препорача официјално отпочнување на пристапни преговори со Украина и Молдавија, а за предлогот шефовите на влади на 27-те земји членки на ЕУ треба да разговараат оваа недела.
Што се однесува до предлогот за отворање преговори за членство со Украина, одговорот на прашањето дали ќе ја добие поддршката на сите земји членки е повеќе од неизвесно откако унгарскиот премиер Виктор Орбан во неколку наврати периодов изјави дека е против преговори со Украина.
Украинскиот министер за надворешни работи Дмитро Кулеба вчера изјави дека би било погубно за Киев и за ЕУ доколку на самитот не биде поддржан почетокот на пристапните преговори.
„Не можам да замислам… Не сакам ни да зборувам за последиците“,
рече Кулеба.
Проширувањето, пишува весникот, стана приоритет на ЕУ откако Русија ја почна војната против Украина. Европската комисија минатиот месец ги поддржа преговорите за влез на Босна и Херцеговина откако Сараево ќе биде подготвено и препорача на Грузија да ѝ се даде статус на земја кандидат.
Северна Македонија во јули минатата година формално ги почна преговорите за членство во ЕУ со скрининг-процесот, но промената на Уставот остана нереализирана поради противењето на најголемата опозициска партија да ги поддржи измените со кои Бугарите би влегле во Преамбулата на највисокиот правен акт на државата. Промената на Уставот е услов земјава да ги продолжи преговорите со отворање на кластерите и поглавјата во рамките на процесот на пристапување.
Анкетата спроведена од Европскиот совет за надворешни односи (ЕЦФР) во шест земји членки на ЕУ ( Данска, Полска, Германија, Романија, Франција и Австрија), покажува значителна поддршка за кандидатурите на Украина и во помала мера на Молдавија и Црна Гора (која веќе неколку години е во процес на преговори за членство), но и длабоки економски и безбедносни грижи, пишува „Гардијан“.
Истражувањето покажува широко спротивставување особено за евентуалното пристапување на Турција во Унијата, но и „ладен одговор“ во однос на изгледите Албанија, Босна и Херцеговина, Грузија, Косово, Северна Македонија и Србија да се приклучат на ЕУ.
Според Пјотр Бурас, висок соработник за политика на ЕЦФР, иако самитот оваа недела ќе се фокусира на патиштата за членство за Украина и на другите земји, дебатата за тоа како точно да се постигне тоа е едвај започната. Тој, како што пренесува британскиот весник повикува на „конкретна временска рамка“ за пристапување.
Според истражувањето, граѓаните на Романија со мнозинство од 51 отсто и на Полска со 48 отсто веруваат дека ЕУ треба да бара проширување, додека меѓу „старите“ земји членки на ЕУ Данска со само 37 отсто е против какво било итно проширување.
Анкетата покажува силно противење на можноста Турција да се приклучи на ЕУ, при што 51 отсто од анкетираните во шесте земји се противат на идејата и помалку од еден од пет испитаници поддржуваат какво било напредување на Турција кон членство во Унијата.
Европејците, исто така, се покажале ладнокрвни во однос на Албанија, Босна и Херцеговина, Косово, Грузија, Молдавија, Црна Гора, Северна Македонија и Србија, со помалку од 30 отсто поддршка за вкупно осумте земји што претендираат за членство
Поддршката за пристапување е најмала за Косово и изнесува 20 отсто, додека 37 отсто се изјасниле дека таа треба да стане дел од Унијата, за Албанија односот е 24 отсто „за“, 35 отсто „против“, Србија, а 25 отсто се „за“ и Грузија 25 отсто се „за“, а 31 отсто „против“.
Мислењето е порамномерно поделено за Северна Македонија (26 отсто „за“, 27 отсто „против“) и Босна и Херцеговина (28 отсто „за“, 29 отсто „против“), додека поддршка има за Молдавија (30 отсто „за“, 28 отсто „против“) и Црна Гора (30 отсто „за“ и 25 отсто „против“) за пристапување во ЕУ.
Истражувањето, како што се наведува, е спроведено од 7 до 19 ноември 2023 година, на репрезентативен примерок од 6 153 испитаници.