Портпаролот на ЕУ, Питер Стано, денеска изјави дека Европа е подготвена и очекува поголем дијалог и поблиска соработка со новата администрација во Вашингтон.
„Постојат многу области каде што можеме да работиме заедно и каде што имаме интерес за тоа. Кога станува збор за надворешната политика, зборувам за Иран, Русија, Либија, Блискиот Исток, но, исто така, и за Балканот и за Турција. Европа е подготвена за посилно пријателство и партнерство со САД“,
изјави Стано.
Во меѓувреме, во САД ситуацијата и натаму е статус кво, со тоа што актуелниот претседател Доналд Трамп одбива да ги признае резултатите од претседателските избори од 3 ноември. Според нив, неговиот противкандидат, демократот Џозеф Бајден, досега има освоено 306 електорски (изборни) гласа, многу повеќе од минималните 270, колку што се потребни за изборна победа. Бајден, исто така, има предност и според освоените гласови од непосредните гласачи.