Со денешните издвоени средства преку ЕПФ, на македонската армија ќе ѝ биде обезбедена опрема со разузнавање, надзор и извидување и за електронско војување, потоа комунални и инженерски возила, комуникациски и информациски системи и опрема за борбена обука, а доколку е потребно ќе се организира и оперативна обука за нивно користење
Советот на ЕУ денеска донесе одлука за доделување на 15 милиони евра помош во рамките на Европскиот мировен инструмент (ЕПФ) за зајакнување на одбранбените капацитети и способности на Армијата на Република Северна Македонија и нејзината оперативна подготвеност, јави МИА.
„Денеска се согласивме да ѝ обезбедиме на Северна Македонија дополнителна поддршка од ЕУ во вредност од 15 милиони евра за нејзината армија. Нашата поддршка ќе и помогне на Северна Македонија да придонесе кон регионалната стабилност и безбедност, што е важно не само за Западниот Балкан, туку и за ЕУ“,
изјави претставничка за надворешни работи и безбедносна политика на Унијата, Каја Калас.
Таа додаде дека овие средства ќе бидат искористени за набавка на различна опрема – од онаа наменета за прибирање разузнавачки информации и за надзор до онаа за потребите на борбената обука.
Според неа, со поддршката за земјава наменета за спречување конфликти и за зајакнување на регионалната стабилност, Унијата покажува дека целосно ја поддржува Северна Македонија на патот кон членство во ЕУ.
„Со нетрпение ја очекувам мојата прва посета следниот месец за дополнително да разговараме за нашата заедничка агенда“,
додаде Калас во изјавата.
Како што соопшти Советот на ЕУ, со денешната одлука и со билатералните пакети за поддршка во 2023 и 2024 година, вкупната помош од Унијата за земјава во рамки на Европскиот мировен инструмент (ЕПФ) достигна 38 милиони евра.
„Денешната одлука го покажува континуираниот ангажман со Северна Македонија во областа на безбедноста и одбраната, вклучително и на потпишувањето на Партнерството за безбедност и одбрана меѓу ЕУ и Северна Македонија минатиот ноември, и го одразува целосното усогласување на земјата со заедничката надворешна и безбедносна политика на ЕУ“,
се наведува во соопштението.
Со денешните издвоени средства преку ЕПФ, на македонската армија ќе ѝ биде обезбедена опрема со разузнавање, надзор и извидување и за електронско војување, потоа комунални и инженерски возила, комуникациски и информациски системи и опрема за борбена обука, а, доколку е потребно, ќе се организира и оперативна обука за нивно користење.