Ескобар, во дебатата за Западниот Балкан во Комитетот за надворешни работи во Претставничкиот дом, рече дека двете држави ја завршиле тешката работа што била потребна, и оти одложувањето на пристапниот процес поттикнува сомнеж во европската иднина на регионот
Најсилната порака што Европската Унија може да ја прати сега е да закаже датум за почеток на пристапните преговори со Северна Македонија и Албанија пред крајот на оваа година, рече Габриел Ескобар, заменик-помошник државен секретар на САД за Европа и Евроазија, пренесе Гласот на Америка.
Ескобар, во дебатата за Западниот Балкан во Комитетот за надворешни работи во Претставничкиот дом, рече дека двете држави ја завршиле тешката работа што била потребна, и оти одложувањето на пристапниот процес поттикнува сомнеж во европската иднина на регионот.
„Затоа државниот секретар Блинкен и висoкиот ЕУ претставник Јосеп Борел на 14 октомври објавија заедничка изјава дека пристапувањето во ЕУ е единствениот пат напред за регионот. Мир, стабилност и просперитет се нашата заедничка цел“,
рече Ескобар, додавајќи дека „работиме со нашите европски партнери да осигураме дека пристапувањето останува реална можност во реална временска рамка“.
Пред почетокот на дебатата, конгресменот Бил Китинг, претседавач со Поткомитетот за надворешни работи на Претставничкиот дом за Европа, ја повика Европската Унија да работи со Бугарија да осигура дека пристапниот процес со Северна Македонија и Албанија ќе може да почне до крајот на годината.
„Исто така, сакам да ги повторам државниот секретар Блинкен и високиот претставник Борел во охрабрувањето на вклучувањето на Западен Балкан во Европската Унија и продолжената поддршка за започнувањето на пристапните преговори со Северна Македонија и Албанија“,
изјави Китинг.
Тој изрази силна поддршка за ангажманот на САД во Западен Балкан како геостратешки регион кој е од витално значење за мирот и стабилноста во Европа.