Ердоган, кој во последниве недели привлече критики во Германија со некои од неговите ставови за конфликтот на Блискиот Исток, нарекувајќи го Хамас „ослободителна“ организација, а Израел „терористичка држава“, ја повтори својата критика кон Израел и повика на хуманитарен прекин на огнот во појасот Газа
Дијалогот е важен и покрај разликите во позициите за блискоисточниот конфликт и ако Германија и Турција успеат да се изборат за прекин на огнот, постои шанса регионот да излезе од огнениот прстен, изјавија во Берлин германскиот канцелар Олаф Шолц и турскиот претседател Реџеп Таип Ердоган.
„Господине претседателе, не е тајна дека имаме сосема различни ставови за овој конфликт… но токму затоа е важно да разговараме во овие тешки моменти“,
рече канцеларот Шолц на прес-конференцијата пред средбата со турскиот претседател.
Шолц уште еднаш ја истакна германската позиција дека правото на Израел да постои е нешто што не е предмет на дебата.
Различни ставови за Израел
„Во нашата земја нема место за антисемитизам, без разлика дали е политички или верски мотивиран“,
додаде Шолц.
Германскиот канцелар рече дека сака да разговара со турскиот претседател како да се спречи ширењето на конфликтот и како да се подобри хуманитарната ситуација.
Ердоган, кој во последниве недели привлече критики во Германија со некои од неговите ставови за конфликтот на Блискиот Исток, нарекувајќи го Хамас „ослободителна“ организација, а Израел „терористичка држава“, ја повтори својата критика кон Израел и повика на хуманитарен прекин на огнот во појасот Газа.
„Бомбардирањето болници или убивањето деца не е напишано во Тора. Тоа не смее да се прави. Станува збор за 13 000 убиени деца, жени и стари лица. Се во Газа е срамнето со земја. Доколку Германија и Турција успеат да постигнат прекин на огнот, постои шанса регионот да излезе од овој огнен прстен“,
порача турскиот претседател.
Германскиот канцеларги истакна заслугите на Турција при склучувањето на договорот за извоз на украински житарки и ги истакна добрите односи меѓу Турците и Германците.
„Граѓаните на Турција и Германија се поврзани на многу начини“,
рече Шолц.
Нагласија дека сакаат да ги зајакнат и економските односи
И двајцата државници истакнаа дека сакаат да ги зајакнат и економските односи. Една од темите на вечерашните разговори е договорот меѓу Европската Унија и Турција за бегалците и продажбата на 40 воени авиони од типот „еурофајтер“ на Турција.
Кусата посета на Берлин турскиот претседател попладнето ја започна со средба со германскиот претседател Франк-Валтер Штајнмаер, а двајцата државници ја истакнаа потребата од смирување на ситуацијата на Блискиот Исток, вклучително и ослободување на заложниците на Хамас.
Ердоган ја заврши посетата со разговор со канцеларот Шолц. Поради неговите конзервативни и авторитарни ставови, турскиот претседател често беше критикуван во Германија, меѓу другото, и поради неговото влијание врз околу три милиони германски жители со турско потекло.