Епидемијата од ковид-19 стивнува: Бројот на оздравени пациенти поголем од активните

Вкупно 1 465 случаи на ковид-19 се регистрирани во земјава, од кои се оздравени 738 лица, починаа 77 лица, а во моментов активни се 650 случаи. Со овие бројки, првпат кај нас имаме ситуација во која преовладува бројката на оздравени пациенти во однос на активните случаи.

Министерот за здравство, Венко Филипче, смета дека е избран идеалниот модел за нашата земја и нашиот здравствен систем за справување со пандемијата, истакнувајќи оти сега се гледаат резултатите од тоа, со постепено намалување на бројот на дијагностицирани пациенти и бројот на тестови.

„Пристапот да се тестираат симптоматични пациенти, да се изолираат нивните контакти, мислам дека даде резултат. Секоја земја избра свој автентичен систем, секоја земја има свои карактеристики на здравствениот систем. Во однос на препораките на СЗО што е тоа што сега како резултат доаѓа во Шведска. Смртноста во Шведска е многу поголема. Таа е некаде околу 12 проценти, ми се чини дека е во првите пет земји во светот според просекот на починати лица. И во таа смисла дискутабилно е дали може да се препорача како добар модел“,

рече Филипче.

Ковид-19: Во Македонија повеќе заразени жени, а повеќе починати мажи

Во врска со можноста вирусот повторно да се врати, Филипче вели дека станува збор за вирус што е респираторен, а сите респираторни вируси се враќаат во есенските месеци.

„Втората работа е во однос на тоа што сè уште е сега претпоставка, следат испитувања и студии. Сепак, има еден тренд на помалку случаи во земјите каде што е задолжителна БСЖ вакцината, што е исто така пулмонален вирус. Значи, има некоја поврзаност, точно не се знае, но дури и покрај тоа што точно не се знае и не е потврдено, ние апсолутно мора да бидеме подготвени и во таа насока одиме. Со овој предизвик со кој сега се соочуваме, не само ние туку целиот свет, искуството не научи и не прави поподготвени за некои следни предизвици“,

додаде Филипче.

Според него, веќе се изготвени сите протоколи за функционирање на многу други сегменти, општествени и економски оператори, фабрики и јавен превоз итн.

„Во текот на следната недела тие ќе бидат официјализирани после финалните консултации со сите кои ги засегаат, со цел да се слушнат евентуални сугестии, после што ќе ги презентираме јавно исто како и временскиот период во кој ги очекуваме овие да ги наречам попуштања на рестрикциите. Сето тоа ќе биде постепено со цел да не се создадат гужви, ниту да се создадат услови за масивни собири“,

истакна Филипче.