Сасоли: Ќе бидат потребни вонредни мерки за последиците од пандемијата во ЕУ
Претседателот на Европскиот Парламент, Давид Сасоли во име на парламентот побара од земјите членки на ЕУ да покажат поголема солидарност и флексибилност во буџетските правила за да се овозможи побрзо закрепнување на претстојната рецесија во ЕУ предизвикана од пандемијата на коронавирус.
„Ова не е само здравствена криза, туку социјална и економска криза која ќе ги засегне сите наши земји и институциите на ЕУ треба да преземат одговорност“,
изјави Сасоли на прес- конференцијата преку видео конференција, додавајќи дека е загрижен за последиците на среден и долг рок, а не само на краток рок.
„Ќе ни биде потребна креативност, нови капацитети, ќе треба да осигуриме вонредни мерки за одговор на кризите, а не само да ги адаптираме постојните инструменти“, рече Сасоли, без да даде повеќе детали на кои механизми точно мисли.
Европскиот Парламент смета дека лидерите треба да преземат одговорност и дека сегашните финансиски и економски инструменти кои се на располагање во ЕУ не се доволни за закрепнување, изјави претседателот Сасоли.