Поранешниот правобранител за подрачјето на Скопје јавно истапува по сторијата на „360 степени“ за состојбите во Државното правобранителство, а во која беа споменати и меѓучовечките односи додека на чело на институцијата беше Агрон Речи
До моето разрешување сум бил исклучително активен и ревносен во постапувањето по секој предмет посебно, немало забелешка од никого за моето работење и сум бил коректен и колегијален со сите колеги државни правобранители, а сè во насока на остварување на функцијата во Државното правобранителство, вели Јанкуловски за „360 степени“
Поранешниот државен правобранител за подрачјето на Скопје, Јане Јанкуловски, кој претходната влада во 2024 г. го разреши по предлог на тогашниот негов шеф, Агрон Речи, тврди дека разрешувањето било експресно, без предлогот да го разгледа надлежната комисија.
„Разрешен сум истиот ден кога е доставен предлогот за мое разрешување, односно на 09.1.2024 е поднесен предлог и за еден час од поднесување на предлогот тогашната влада, спротивно на одредбите од Деловникот за работа на Владата, го ставила таквиот предлог на дневен ред во точка ‘Предлози и прашања’ и веднаш бев егзекутиран од функцијата државен правобранител за подрачје Скопје. Разрешен сум со еден необразложен предлог, без наведување на никакви факти и докази, без доставување на целокупниот предмет на запознавање и проучување од Владата како орган кој разрешува во конкретниот случај… Ќе се сложите со мене дека за еден час не можете да извадите еден извод од матична книга кога има малку зголемена фреквенција на странки“,
вели Јанкуловски во допис до „360 Степени“.
По разрешувањето, Јанкуловски повел управен спор. Постапката по жалба сега се наоѓа пред Вишиот управен суд.
„Тужбата без ниту една разумна причина е одбиена како неоснована, иако беше детално образложена и беа наведени сите причини и законски основи што решението за разрешување го прави незаконито. Не постои ниту една повреда на ниту една законска одредба при моето постапување во конкретниот случај за кој сум разрешен. Разрешен сум со лажни наоди случајно ‘наместени’ за една ваква постапка. Како може во оваа држава како разрешен државен правобранител според Управниот суд да немам право да докажувам во судска постапка дека не сум сторил ниту една повреда на ниту еден закон, преувеличувајќи го притоа дискреционото право на органот што разрешува (Владата во претходниот состав), во кое Управниот суд не навлегувал. Замислете, државниот правобранител доставил предлог без факти, без докази, необразложен, Владата ме разрешила и Јане Јанкуловски не смее да го оспори тоа. Ова е една голема срамота, тотален апсурд и злоупотреба на правата од носители на јавни функции од позиција на моќ, без санкција… Предметот во моментот се наоѓа на одлучување пред Вишиот управен суд по поднесена жалба од моја страна за кое имам поднесено барање за приоритетно одлучување по кое искрено се надевам дека судот ќе одговори позитивно“,
наведува Јанкуловски.
Поранешниот правобранител вели дека ниту знаел дека ќе биде поведена постапка за разрешување ниту, пак, за што. За одлуката дознал од медиумите. Потоа, со барање за пристап до информации од јавен карактер, од Владата побарал и добил информација дека Комисијата за именување не одржала седница и од таа причина кадровските прашања биле разгледувани директно на владина седница на 9 јануари 2024. Тој ни го приложи и одговорот на барањето до Владата.
„По приемот на решението чекав 20 дена да ги дознаам причините за моето разрешување, а сите списи да ги добијам по слободен пристап до информации од јавен карактер. Ете толку е коректноста на Државното правобранителство спрема мене… Во мојот случај нема одлука на Комисијата за избори и именувања, а за тоа имам потврда од Владата по поднесено мое барање. Не бев известен дека е поведена постапка, како би можел пред Владата да го образложам и детално поткрепам со факти и докази моето постапување во конкретниот предмет. До моето разрешување сум бил исклучително активен и ревносен во постапувањето по секој предмет посебно, немало забелешка од никого за моето работење и сум бил коректен и колегијален со сите колеги државни правобранители, се во насока на остварување на функцијата на Државното правобранителство“,
посочува тој.
Јане Јанкуловски и Мирко Велјановски се двајцата правобранители кои претходната влада ги разреши во 2024 година, по предлог на тогашниот шеф на Правобранителството, Агрон Речи.
Од Речи тогашната влада добила и трет предлог за разрешување, за државната правобранителка за подрачјето на Скопје, Симона Зориќ Ристова. За неа актуелната влада потврди дека постои таков предмет пристигнат во мај 2024 година, по кој не било постапено во тоа време.
„Од страна на Комисијата за именувања сме информирани дека во наредниот период ќе ги согледа сите состојби поврзани со предметот, по што ќе постапи соодветно“,
одговорија од Владата за „360 Степени“.
Инаку, Агрон Речи беше шеф на Државното правобранителство од април 2023 до август 2024 година, или околу една и пол година. Во интервју за „360 степени“, тој претходно, меѓу другото, зборуваше за девастираност во работењето и во меѓучовечките односи во институцијата што треба да се грижи за заштита на имотните права и интереси на државата.
„Единствен државен правобранител во тоа ДП откако е формирано, мислам дека сум прв што има разрешено двајца државни правобранители за нестручно работење“,
спомена Речи во прилог на „360 Степени“.