Доцентот по уставно право на „Јустинијан Први“ при УКИМ, д-р Денис Прешова смета дека не треба да се прави баук од воведувањето вонредна состојба. За него, во вакви околности, освен повисоко ниво на свест и совесност, потребна е и поддршка на институциите. Тоа, како што вели Прешова, подразбира донесување одлуки кои дополнително ја зацврстуваат довербата и легитимитетот на институциите.
„Не треба да се прави „баук“ од вонредната состојба бидејќи тоа е уставен механизам присутен во речиси сите уставни системи со кој се дава еден вид на уставен легитимитет на извршната власт, односно Владата, да презема неопходни мерки на брз и ефикасен начин. Ваквите мерки, какви што се впрочем и сегашните, можат да задираат во одередени уставни права и слободи, а истото е дозволено во ситуации на воена или вонредна состојба. Впрочем вонредната состојба не детерминира конкретни мерки, туку дава уставна основа за одредено постапување. Така што, за граѓаните под сегашните услови можно е да нема разлика. Во услови на вонредна состојба Уставот и правниот поредок не се суспендирани. Со оглед на тоа што се работи за сензитивно прашање треба да се пристапува внимателно. Дали државното раководство ќе ги употреби овие механизми зависи од нивната процена, бидејќи тие ги имаат сите релевантни информации“,
пишува Прешова на својот Фејсбук профил.
Тој исто така, ги потсетува носителите на највисоките извршни функции, кога се повикуваат на наводни преседани поврзани со распуштањето на Собранието во 2016 година, за одлуката У.бр. 104/2016 на Уставниот суд од 25 мај 2016 година, по поднесената иницијатива од Талат Џафери.
„Со Уставот не е утврдено мандатот на пратениците во Собранието да продолжи во случај на распуштање на Собранието, ниту е предвидено во таков случај тие да продолжат со должноста. Според тоа не може да постои било какво одлагање на распуштање на Собранието, а со тоа и одложено губење на мандатот на пратениците. Спротивно на изнесеното, Собранието продолжи да работи во својот полн капацитет во периодот од 19.01.2016 година кога е донесена првата Одлука за самораспуштање со одложно дејство, па се до 07.04.2016 година кога Собранието фактички се самораспушти. Според членот 63 став 3 од Уставот на Република Македонија скратениот рок за вонредни парламентарни избори (60 дена) не трпи одлагање, а мандатот на пратениците не може да продолжи во случај на самораспуштање на Собранието, надвор од условите утврдени во членот 63 став 4 од Уставот, од каде Судот утврди дека со оспорената одлука се прави повреда на членот 63 ставовите 3 и 4 од Уставот на Република Македонија“,
вели Прешова.
Според него, „ваквата состојба доведува и до правна несигурност и повреда на владеењето на правото како темелна вредност на уставниот поредок утврдена во членот 8 став 1 алинеја 3 и членот 51 од Уставот, бидејќи Собранието на Република Македонија е должно да ги почитува Уставот и законите, што овде не е случај“.