Граѓанската иницијатива „Стоп Русино, чист воздух за Гостивар“ дефилираше со автомобили и транспаренти по повеќе градски улици
Група еко-активисти доцна попладнево излегоа на нов протест низ Гостивар, со цел да го свртат вниманието на јавноста и на институциите за ризикот од неконтролираното депонирање на смет на депонијата „Русино“.
Граѓанската иницијатива „Стоп Русино, чист воздух за Гостивар“ дефилираше со автомобили и транспаренти по повеќе градски улици.
И второто протестно дефиле е поради палењето на отпадот на депонијата и зголеменото загадување на воздухот.
Еко-активистите бараат и дислокација на регионалната депонија, со што, како што велат, ќе се стави крај на труењето на гостиварци и несосвесното работење на комуналните претпријатија и надлежните државни власти.
„Русино гори, капацитет нема, иако надлежните ќе го кажат спротивното. Локацијата е несоодветна и придонесува за загадување на водухот. Русино е тивок убиец и го загадува целиот гостиварски регион. Здравјето ни е загрозено, животната средина уништена. Бараме да се затвори депонијата и еднаш засекогаш да се реши овој проблем“,
велат од иницијативата „Стоп Русино, чист воздух за Гостивар“ .
Поддршка за протестот даде и градоначалникот на Гостивар Арбен Таравари, кој на својот фејсбук-профил напиша: „Вечерва од 18 часот заедно ќе протестираме поради депонијата Русино“.