„Северна Македонија се обврза да го измени својот Устав. Тоа е суверена одлука. Во овој поглед се преземени првични чекори. Земјата дава добар пример за мултиетничко општество. Затоа, со измена на Уставот дополнително ќе се унапредат основните права“, вели портпаролката на Европската комисија (ЕК), Ана Писонеро, во изјава за МИА
Откако вчера собраниската Комисија за уставни прашања ја изгласа потребата за пристапување на измена на Уставот, од Европската комисија (ЕК) денеска во изјава за МИА повторно испратија порака – сите политички сили во земјата, вклучително и опозицијата, треба да работат заедно за обезбедување на иднината на Северна Македонија во Европската Унија.
Ставот на ЕК, кој досега во повеќе наврати го истакнаа претставници на Унијата и нејзини земји членки, денеска го повтори портпаролката на ЕК, Ана Писонеро, која во изјавата за државната новинска ангенција вели дека земјава се обврзала на измени на Уставот.
„Северна Македонија се обврза да го измени својот Устав. Тоа е суверена одлука. Во овој поглед се преземени првични чекори. Земјата дава добар пример за мултиетничко општество. Затоа, со измена на Уставот дополнително ќе се унапредат основните права“,
вели во изјавата Писонеро.
Во врска со скрининг-процесот на земјава со ЕУ, од Комисијата велат дека тој се одвива непречено и тече според предвидената динамика. До Советот на Унијата, велат од ЕК, веќе се доставени извештаите од скринингот за кластерот „Темелни вредности“.
„Што се однесува до неусогласености на националното законодавство со нормите и стандардите на ЕУ, главната цел на скринингот е да се процени каде постојат пропусти во домашното законодавство, вклучително и при имплементацијата и спроведувањето“,
вели Писонеро.
Скрининг-процесот, кој започна веднаш по одржувањето на правата Меѓувладина конференција минатата година, според портпаролката на ЕК претставуваше значаен напредок кој означи почеток на нова фаза во процесот на пристапување на земјава кон ЕУ.
Инаку, уставните измени, со кои Бугарите и припадниците на уште неколку други заедници треба да влезат во Преамбулата на Уставот, се услов за одржување на втората Меѓувладина конференција, со што преговарачкиот процес меѓу С Македонија и ЕУ треба да продолжи со отворање на кластерите.
Процедурата за уставни измени почна вчера, откако собраниската Комисија за уставни прашања со 10 гласа „за“ и седум „против“ го поддржа предлгогот на Владата за пристапување кон измена на Уставот.
Иако дебатата пред собраниската Комисија беше предвидено да трае 10 дена, таа заврши по околу два часа расправа, откако пратениците на опозициската ВМРО-ДПМНЕ го повторија својот став дека нема да поддржат уставни измени под бугарски диктат и дека веќе нема да се вклучуваат во дебата пред собраниското комисиско тело.
По поминувањето на првиот собраниски филтер, сега предлогот ќе оди на пленарна седница, која е закажана за 18 август. Тогаш ќе биде потребно двотретинско мнозинство (најмалку 80 гласа) за да се усвои потребата од носење на уставни измени и процедурата да продолжи со следната фаза – подготовка и усвојување на нацрт-амандмани.
Предлог-иницијативата за уставни измени ја образложи премиерот Димитар Ковачевски, кој рече дека ова е шанса земјата да ја внесеме во Европската Унија и дома да донесеме европски квалитет на живот, потенцирајќи дека сега се на ред пратениците кои следните неколку недели ќе покажат кој мисли само за себе, а кој за интересите на граѓаните и на државата.
„Уставните измени што се пред вас не загрозуваат ниту едно македонско идентетско прашање. Тоа е целосно јасно и прецизно и тоа е цврст став. Воедно, предлогот ги поддржува и интензивира процесите кон целосна интеграција на Северна Македонија во Европската Унија. Затоа граѓаните нема за што да бидат загрижени, а на нас како одговорни носители на јавни функции е обврската тоа добро да го објасниме и да носиме мудри одлуки што носат перспективи, а нема да ја заглават државата во нова долгогодишна изолација“,
рече Ковачевски.
Веднаш по него зборуваше координаторот на пратеничката група на опозициската ВМРО-ДПМНЕ, Никола Мицевски, кој најави дека ќе биде единствен говорник од неговата партија. Повика предлогот за уставни измени веднаш да оди на пленарна седница и да биде ставен на гласање. „Да видите како пропаѓа предлогот под бугарски диктат“, рече тој.
„Ова не е никаква шанса за напредок на државата, туку шанса за лично профитирање на грбот на државата, за уште некое ’ауди’ – подарок од комшијата, за уште некој бизнис под превезот на демократијата… Во името на граѓаните ви велам дека нема да може, а уставни измени под бугарски диктат нема да има. Ниту пратеници ниту народ имате“,
рече Мицевски.
Во предлог-иницијативата што ја усвои Владата, а вчера помина на собраниска комисија, се предлага бугарскиот и уште пет други народи да се додадат во Преамбулата од Уставот – хрватскиот, црногорскиот, словенечкиот, еврејскиот и египќанскиот народ.
Покрај ова, предвидена е уште една уставна измена во однос на составот на Комитетот за односи меѓу заедниците со која се предвидува да се измени бројот на членовите, и тоа наместо досегашните 19 члена, бројот да се зголеми на 43 члена, при што 16 члена од редот на пратениците во Собранието – Македонци и Албанци, и по еден член од редот на пратениците Турци, Власи, Роми, Срби, Бошњаци, Бугари, Хрвати, Црногорци, Словенци, Евреи и Египќани.