„Ситуацијата и натаму останува навистина кревка. Повикуваме на воздржаност од двете страни за ситуацијата да остане мирна и да се избегнат сите дејствија кои би имале потенцијал да се вратат на насилство и ескалација“, изјави портпаролката за надворешна политика на Европската Унија, Набила Масрали
Европската комисија (ЕК) ја поздравува деескалацијата во Косово и остранувањето на барикадите што ги поставија косовските Срби, но и натаму смета дека ситуацијата во северно Косово е сè уште многу кревка.
Ова, како што јави српската агенција Бета, денеска го изјави портпаролката за надворешна политика на Европската Унија, Набила Масрали, која додаде дека ЕУ одигра активна улога во последните настани меѓу Косово и Србија во координација со САД и КФОР.
„Ситуацијата и натаму останува навистина кревка. Повикуваме на воздржаност од двете страни за ситуацијата да остане мирна и да се избегнат сите дејствија кои би имале потенцијал да се вратат на насилство и ескалација“,
рече Масрали и додаде дека ЕУЛЕКС ќе продолжи да ја следи ситуацијата во Косово.
Портпаролката за надворешна политика на ЕУ рече дека настаните од претходните денови покажале колку е важно да се одржи неповратниот напредок кон нормализација на односите меѓу Косово и Србија врз основа на европскиот предлог, што, пак, значи дека претходно постигнатите договори за враќање на Србите во приштинските институции и формирањето на Заедницата на српски општини (ЗСО) треба да се спроведе без одлагање.
Таа изјави дека ЕУ ќе продолжи да разговара со двете страни и дека следните состаноци ќе бидат објавени кога ќе биде вистинскиот момент.
Доцна попладнево беше тргната и последната барикада на северот на Косово, јави РТС.
Единицата на КФОР спроведе инженерска операција и ги отстрани двата запалени камиони кои го блокираа патот на локација позната како Дудин Крш во Северна Митровица, а кои беа запалени на 29 декември.
Во соопштението на КФОР, како што додава РТС, се наведува дека возилата се отстранети со цел патиштата на северот на Косово да бидат проодни и да се врати слободата на движење.