Според првичните информации од портпаролот на СВР Штип, Гордана Панајотова несреќата се случила во 19.45 часот, а во неа учествувале автобус и возило „опел астра“. Лекарите од Итната медицинска помош на лице место констатирале дека животот го загубил сопатникот од автомобилот, а возачот со повреди е хоспитализиран во Клиничката болница Штип
Едно лице загина во тешката сообраќајна несреќа, која вечерва се случила меѓу автобус со беровски регистарски ознаки и возило марка „опел астра“со пробиштипски ознаки на експресниот пат Штип-Кочани, во близина на клучката кај штипската приградска населба Три Чешми.
Според првичните информации од портпаролот на СВР Штип, Гордана Панајотова несреќата се случила во 19.45 часот.
Лекарите од Итната медицинска помош на лице место констатирале дека животот го загубил сопатникот од автомобилот, а возачот со повреди е хоспитализиран во Клиничката болница Штип.
Ален Ѓеоргијев, директор на Клиничката болница Штип, за МИА потврдил дека едно лице од сообраќајната несреќа веќе е на испитување кај нив, со цел да се утврдат повредите и да му се укаже соодветен лекарски третман.
Повредени патници во автобусот нема.
Полициски екипи и надлежен јавен обвинител се на местото на несреќата и вршат увид.
Поради сообраќајната несреќа, во моментов екпсресниот пат Штип-Кочани кај клучката Три Чешми е затворен за сообраќај, соопшти АМСМ во вонреден извештај.
Сообраќајот на поголемиот дел од патиштата во државава се одвива отежнато поради магла.
Како што информираше претходно АМСМ, намалена видливост од 50 до 100 метри има на патните правци Кочани – Штип, Битола – Прилеп – Плетвар, Кичево – Македонски Брод, Скопје – Куманово, Скопје – Велес и Велес – Катланово, а на патот Тетово – Групчин видливоста е до 50 метри.