Под мотото „ПОМЕН – една година тишина!“, по повод една година од забраната за одржување јавни настани поради ковид-пандемијата, в понеделник напладне, во организација на Асоцијацијата на ивент-индустријата – ИВАП, ќе се одржи собир пред Владата со барање за финансиска помош за излез од кризата.
„Со овој собир сакаме да ѝ го свртиме внимание на Владата, но и на јавноста за состојбата во нашата дејност која навистина е голем губитник од пандемијата. За жал, ние како дејност немаме никаква помош од страна на нашата држава. Ниту сме препознаени и разбрани како сектор, а без помош и поддршка не е возможно да опстанеме после цела година неработење“,
велат од ИВАП.
Оттаму посочуваат дека деновиве е зголемен бројот на заболени, што сериозно ги загрижува бидејќи, како што велат, тоа значи дека уште долго нема да може да работат.
„Како одговорни граѓани и компании, сметаме дека е неумесно да бараме да одржуваме јавни настани при ваква состојба. Ние не правиме тајни настани, не ги прекршуваме законите и прописите и не ѝ создаваме проблеми на Пазарната инспекција. Затоа, сметаме дека немаме друг избор освен Владата да изнајде начин и да му помогне на овој сектор“,
порачуваат од ИВАП.
Потсетуваат дека во последниот пакет мерки Владата објави дека се наменети средства за секторот за организација на настани, но, посочуваат, моделот што го предложи ниту некому му е јасен ниту, пак, има најава кога би можеле да се надеваме на реализација.
„Ние понудивме неколку модели за помош, но ниту еден од нив не бил земен пред вид и понуден е целосно нов, нејасен модел без рокови и јасни правила што остава простор за сомнеж во неговата правичност и намена“,
потенцираат од ИВАП.