„Земјите од Западен Балкан се подобри бидејќи НАТО ја отвори својата врата, а Вашингтон ја подаде раката. Мојата земја е жив доказ за таа трансформација. Денеска активно придонесуваме за колективната сигурност. Нашите војници служат од Балтикот до Балканот. Не чекаме да бидеме повикани, туку чекориме напред“, вели министерот на одбележувањето на 30-годишнината на Дејтонскиот договор
Брзата реализација на европските и евроатлантските интегративни процеси е суштинска за реформскиот напредок, стабилноста и отпорноста на земјите од регионот, како и за спречување на влијанија кои не се во интерес на демократијата. Ова е пораката што министерот за надворешни работи и надворешна трговија Тимчо Муцунски ја испрати на одбележувањето на 30-годишнината на Дејтонскиот договор во рамки на пролетната сесија на Парламентарното Собрание на НАТО, во Дејтон, Охајо.
За време на престојот, министерот Муцунски се обрати на сесијата посветена на унапредувањето на стабилноста на Западен Балкан, како и на завршната Пленарна седница, со која беше заокружен овој значаен настан. Во текот на двете сесии беа разменети мислења за напредокот на земјите од регионот и за актуелните безбедносни предизвици.
Посочи на значењето на Дејтонскиот договор како документ кој стави крај на еден од најтешките конфликти на Балканот.
Според него, 30-годишнината од овој договор треба да се искористи како можност за фокус кон иднината, односно кон стабилност, економски напредок, социјална благосостојба и европска перспектива, еднакво важни за сите граѓани во регионот.
„Дејтонскиот договор заврши брутална војна, но мирот не е само цел, туку дисциплина, процес и одговорност што треба да се негува, брани и обновува пред новите закани. САД станаа олицетворение на таа одговорност со јасност, убедувања и конзистентност. Би сакал да оддадам почит на администрацијата на американскиот претседател Доналд Трамп, чија стратешка дипломатија донесе нова итност во нашата одбрана, го оживеа споделувањето на товарот и покажа дека кредибилитетот почнува со посветеност. Американското водство не е само добредојдено, туку и незаменливо. Кога САД се вклучуваат, Алијансата стои поцврсто“,
рече Муцунски во обраќањето.
Според него земјите од Западен Балкан се подобри, бидејќи НАТО ја отвори својата врата, а Вашингтон ја подаде раката.
„Мојата земја е жив доказ за таа трансформација. Денеска, активно придонесуваме за колективната сигурност. Нашите војници служат од Балтикот до Балканот. Нашите одбранбени трошоци ни се на прагот од 2 отсто, а над 30 отсто од нив се за модернизација и подготвеност. Не чекаме да бидеме повикани, туку чекориме напред. За нас НАТО не е само безбедносна структура, туку морален компас, сојуз воден од вредности што ја штити слободата, ја негува демократијата и го брани човековото достоинство“,
вели министерот.
Тој истакна и дека, во услови на зголемени безбедносни закани, регионот мора да се насочи кон засилена координација и реализација на долгорочните цели за негово успешно вклучување во европските и евроатлантските структури.
Говорејќи за претстојниот Самит на НАТО во Хаг, Муцунски подвлече дека одвраќањето не се постигнува со декларации, туку со инвестиции, решителност и кредибилни капацитети.
„Единството мора да биде функционално, не само декларативно. На Самитот во Хаг, македонската Влада цврсто ќе застане со американските сојузници. Нашата земја е подготвена како верен сојузник, одговорен партнер и цврсто верува дека најдобро ќе го почитуваме Дејтонскиот договор, градејќи мир, демократија, напредувајќи заедно како сојузници“,
кажа тој.
На одбележувањето на 30-годишнината од Дејтонскиот мировен договор, Муцунски учествува на покана на конгресменот и шеф на делегацијата на САД во Парламентарното собрание на НАТО, Мајкл Тарнер.
Во рамки на активностите на Парламентарното собрание на НАТО, министерот Муцунски, заедно со генералниот секретар на НАТО, Марк Руте, претседателите на Албанија, Косово и Црна Гора, премиерот и министерот за надворешни работи на Хрватска, членови на Претседателството на Босна и Херцеговина и други лидери од регионот, присуствуваше на свечениот прием на локацијата каде што беше потпишан Дејтонскиот договор, во воздухопловната база „Врајт-Патерсон“.