Дополнителната заменик-министерка за внатрешни работи Славјанка Петровска, во интервју за „360 Степени“ зборуваше за поништувањето на решенијата на министерот Наќе Чулев од страна на владата и каква е фактичката ситуација на терен.
Таа рече дека кај најголем дел од спорните позиции на терен се применува решението од владата, но има и позиции каде има двојство, па тука се вклучил и Македонскиот полициски синдикат.
„За жал, еден од спорните моменти, заради што се загрижени е состојбата во една од специјалните единици, односно во Единициата за брзо распоредување. Поприлично беше напната и тензична ситуацијата, што доведе во момент да има двојна контрола, што е апсолутно недозволиво, и МПС ценејќи дека тоа може да ескалира, побара состанок со раководството на МВР, јас апсолутно одговорив на таа покана, разговаравме, ги искажав моите позиции и дадов предлог да седнеме сите заедно на маса и да го надминеме проблемот. Во тек се разговорите за ова прашање и искрено, бидејќи станува збор за веќе безбедносно прашање се надевам дека ќе ги тргнеме на страна политичките притисоци и партиските агенди и дека ќе одлучиме онака како што е во интерес на вработените“,
рече Петровска.