Двете државјанки на С Македонија, на возраст од 54 и 40 години, по лекарскиот преглед и добивањето потврда за вакцинација ја напуштиле спортската сала, иако не биле вакцинирани
Две државјанки на Северна Македонија ги доведоа во заблуда здравствените работници во Србија, успевајќи да добијат потврда за вакцинација, иако не ја примиле вакцината, јави МИА од Белград.
Инцидентот се случил во саботата околу 12 часот во Спортската сала во Врање, на главниот пункт за вакцинација, потврдија од oсновното јавно обвинителство во тој град.
Двете државјанки на Северна Македонија од Скопје, на возраст од 54 и 40 години, по лекарскиот преглед и добивањето потврда за вакцинација ја напуштиле спортската сала, иако не биле вакцинирани.
Според Миодраг Стојановиќ, портпарол на Основното јавно обвинителство во Врање, државјанките на Северна Македонија биле запрени на граничниот премин „Прешево“, кога биле уапсени за кривично дело наведување на заверка на лажна содржина, по што биле сослушани и казнети со уплата за хуманитарни потреби од по 60 000 динари (510 евра).
„Двете државјанки на Северна Македонија (54) и (40), од Скопје, дојдоа во спортската сала во Врање, а потоа ги доведоа во заблуда здравствените работници за да им дозволат да ја пополнат согласноста за вакцинација против ковид-19, така што по медицинскиот преглед и добивањето потврда за вакцинација, се оддалечија од Спортската сала без да ја примат вакцината. Потоа, тие беа запрени на граничниот премин ’Прешево’, кога беа уапсени за кривично дело наведување на заверка на лажна содржина и сослушани, а по примената на принципот на опортунитет ја исполнија наложена основа со уплата за хуманитарни потреби од по 60 000 динари“,
се наведува во соопштението на портпаролот на Основното јавно обвинителство во Врање, Миодраг Стојановиќ, како што пренесува МИА.