МВР информира дека се преземаат мерки за пронаоѓање на лицата и за расчистување на случајот
Министерството за внатрешни работи (МВР) во денешниот полициски билтен открива детали за вчерашната престрелка во близина на полициската станица кај Бит-пазар во која загина едно лице. Пукањето се случило вчера попладне околу 14 часот на улицата „Војдан Чернодрински“ на подрачјето на Бит-пазар.
Две лица со мотор пристигнале на местото и со огнено оружје почнале да пукаат кон лице кое веќе било на локацијата. Пукале кон 31-годишниот А.С. кој со здобиената рана бил пренесен на Комплексот клиники „Мајка Тереза“ каде што и починал попладнето околу 16 часот.
„На местото на настанот најдени се повеќе чаури, а оштетени се неколку изложни стакла од околните продавници, како и неколку паркирани возила. Се преземаат оперативни тактички мерки за пронаоѓање на лицата и за расчистување на случајот“,
се наведува во полицискиот билтен.
Претходно денеска ОЈО Скопје информира дека ќе се врши обдукција на телото на починатиот во претстрелката и дека е издадена наредба за обезбедување на снимките од камерите за видеонадзор од околните објекти.