Двете директорки признале вина кога обвинението стигнало на суд, на што му претходеле кривични пријави од МВР во периодот кога со овој ресор раководи Панче Тошковски како технички министер
Сертификатите на осудените директорки се од ноември и декември 2022 година. Сертификатот на директорот на АНБ е од истата 2022 година, но од март
Две директорки на јавни установи се осудени на условни казни затвор од по четири години на почетокот на месецов бидејќи кога конкурирале за позицијата, како доказ за познавање на англиски јазик, приложиле ТОЕФЛ-сертификат издаден од компанијата „Јулија ЦО ЛТД“ од Пловдив, Бугарија. Тоа е истото правно лице од каде што потекнува и ТОЕФЛ-сертификатот на неодамна избраниот директор на Агенцијата за национална безбедност (АНБ), Бојан Христовски.
Според пресудата, во која увид имаше „360 степени“, едната директорка:
„Употребила како вистински лажни исправи – Сертификат за познавање англиски јазик бр. е-ENG131/30.11.2022 од училиште за странски јазици ЈУЛИЈА ЦО. ЛТД од Пловдив, Р Бугарија и ETS TOEFL IBT – Test taker score report од 3.12.2022 година, иако такви исправи не биле издадени на начин што најпрвин ги превела кај овластен преведувач, а потоа ги употребила како доказ дека има познавање на англиски јазик и поседува сертификат TOEFL IBT, при нејзиното аплицирање на јавен оглас.“
И кај другата директорка делото е слично, со исклучок на тоа што не се спомнува преведување:
„На 14.7.2023 година обвинетата… употребила како вистински лажни исправи – Сертификат за познавање на англиски јазик бр. е-ENG122/31.10.2022 од училиште за странски јазици ЈУЛИЈА ЦО ЛТД од Пловдив, Р Бугарија и ETS TOEFL IBT – Test taker score report од 26.11.2022 година, иако такви исправи не биле издадени, на начин што како доказ дека има познавање на англиски јазик ги употребила при нејзиното аплицирање на Конкурс…“
И двете обвинети признале вина кога предметот стигнал на суд, па на рочиштето не се изведувани докази за тоа како стигнале до сертификатите. Но, јасно е како двете стигнале на обвинителна клупа.
На 14 февруари Министерството за внатрешни работи предводено од Панче Тошковски, тогаш како министер во техничката влада, соопшти дека Единицата за корупција при Одделот за сузбивање на организиран и сериозен криминал, поднело кривична пријава до Основното јавно обвинителство Скопје поради постоење основи на сомнение за сторено кривично дело употреба на исправа со невистинита содржина. Во соопштението на МВР понатаму се вели:
„Пријавената Т.К., вработена во основно училиште во с. Драчево, скопско и пријавената С.К., вработена во Општа болница Дебар, набавиле лажни меѓународни сертификати за познавање на англиски јазик, издадени од училиште за јазици од Република Бугарија. Т.К. го употребила сертификатот при аплицирање на јавен оглас за избор на директор на основно училиште во с.Драчево, по што со решение на градоначалникот на општина Кисела Вода била именувана за директор во училиштето.
На сличен начин, С.К. го употребила сертификатот за познавање англиски јазик при аплицирање на конкурс за именување директор на ЈЗУ Општа болница Дебар, по што од министерот за здравство била именувана за вршител на должноста – директор на ЈЗУ Општа болница Дебар“.
Врз основа на доказите и кривичната пријава од МВР, ОЈО Скопје формира предмет кој бргу напредува до обвинение. Обвинетите решаваат да признаат вина штом предметот стигнува пред Основниот кривичен суд Скопје и се осудени на по две години казна затвор, со тоа што таа казна нема да се изврши доколку не сторат друго кривично дело во следните четири години од правосилноста на пресудата.
Сертификатот на Христовски е од истата година
Бојан Христовски беше именуван за директор на АНБ на владината седница на 16 октомври 2024 година. Само два дена подоцна, во Билтенот на Универзитетот „Св. Климент Охридски“-Битола, беше објавен извештај од рецензентската комисија откако тој конкурира на Конкурсот за избор на асистент на Факултетот за безбедност во Скопје.
Во приложената биографија, меѓу другото, пишува:
„Има приложено уверение за познавање на англиски јазик TOEFL iBT со 75 бода од 26.03.2022 година, Language Shool Julia CO.LTD, Пловдив Бугарија и уверение за активно познавање на програмата за канцелариско работење.“
Во биографијата не е споменат бројот на сертификатот, но видливо е дека е издаден од истиот правен субјект за кој веќе има судски пресуди за фалсификат во македонските судови. Дополнително, и сертификатот на директорот на АНБ и сертификатите на сега веќе осудените директорки се од 2022 година – на Христовски е од март, а на директорките од ноември и декември.