Рашковски и Станчев во петокот беа изведени пред судија на претходна постапка и за нив Обвинителството бараше ефективен притвор поради опасност од бегство и влијание на сведоци, но судот им ја изрече поблагата мерка – куќен притвор
Двајца од осомничените во случајот со ексгенералниот секретар на Владата, Драги Рашковски, за набавката на софтверот, добија мерки на претпазливост откако такво барање поднесе Обвинителството за гонење организиран криминал и корупција.
Судија на претходна постапка им определи: забрана за напуштање на живеалиштето, обврска да се јавуваат во судот, одземање на пасошите и други патни исправи и забрана за издавање на нови, како и забрана за преземање работни обврски поврзани со кривичното дело.
Одлуката следува откако денеска двајцата биле повикани во судот за да се произнесат за предлогот за мерките што ги даде Обвинителството.
Тие заедно со Рашковски и сопственикот и управител на „Инвока гроуп“, Даниел Станчев, се осомничени за злоупотреба на службената положба и овластувања.
Рашковски и Станчев во петокот беа изведени пред судија на претходна постапка и за нив Обвинителството бараше ефективен притвор поради опасност од бегство и влијание на сведоци, но судот им ја изрече поблагата мерка – куќен притвор. Образложението на судот беше дека Обвинителството не доставило доволно докази за имотната состојба и за начинот како тие би влијаеле на истрагата. Од друга страна, пак, обвинителката Ивана Трајчева смета дека има доволно докази и најави дека ќе поднесе жалба и ќе бара ефективен наместо куќен притвор. За жалбата треба да се изјасни Кривичниот совет во судот.
- (ВИДЕО) Драги Рашковски донесен во Кривичниот суд
- Наместо притвор, Кривичен одреди куќен притвор за Рашковски
- (ВИДЕО) Обвинителката Трајчева: Рашковски и од куќен притвор може да влијае на сведоци, ќе поднесам жалба
Истрагата за набавката на софтверот за сообраќајни прекршоци Обвинителството ја отвори во четвртокот, по што во петокот следуваше приведувањето на Рашковски. Истрагата дојде по неполн месец од отворање на предистрагата по допрен глас што, пак, следуваше по објавата на „360 степени“.
Истрагата опфаќа три тендери, сите поврзани со софтверот. Според Обвинителството, Рашковски со еден од останатите осомничени ја договорил набавката на софтверот доставувајќи сопствен патент за кој дал насоки да се изготви техничката документација за јавната набавка.
„Четвртоосомничениот како надворешен соработник пренесувал информации за текот на постапката на осомничените – учесници во јавната набавка. Во текот на постапката за јавната набавка наместо комуникацијата да се извршува со користење електронски средства преку Електронскиот систем за јавни набавки, со цел фаворизирање на конкретен економски оператор првоосомничениот лично ги дефинирал техничките спецификации што упатуваат на патентот. На 02.01.2020 година, првоосомничениот донел Одлука за избор на најповолен понудувач за економскиот оператор каде сопственик и управител е второосомничениот и бил склучен Договор за набавка на услуги. Во месец јули истата година економскиот оператор доставил фактура на износ од 4 997 300 денари (околу 81 000 евра) со вклучен 18% ДДВ, па иако софтверот не бил имплементиран, фактурата во рок од седум дена била исплатена“,
соопшти Обвинителството по отворањето на истрагата.
Покрај овој тендер, според Обвинителството, летото 2019 Рашковски донел уште две одлуки за јавна набавка за работи потребни за софтверот, иако во тоа време сè уште не бил склучен договор за негова набавка. Така, за овие два тендери биле склучени договори во износ од 1 416 000 (околу 23 000 евра) и 4 605 021 денари (речиси 75 000 евра).
Така, вкупната сума со која според Обвинителството се стекнале фирмите што ги добиле тендерите, а на штета на државниот буџет, е 11 018 321 денари (речиси 180 000 евра).