Шефот на дипломатијата кон крајот на јануари гостуваше во собраниската Комисија за надворешни работи, чиј претседател сега бара Османи да дојде повторно до 2 март и да им ја презентира на пратениците целосната писмена документација во врска со именувањето на актуелните генерални конзули
ВО МНР повторно ќе стигне покана до шефот на дипломатијата Бујар Османи да се обрати до собраниската Комисија за надворешни работи. Претседателот на оваа Комисија, Антонио Милошоски од ВМРО-ДПМНЕ, овој пат го вика Османи на отчет за именувањето конзули, по случајот, кој го негира МНР, со наводното испраќање 28-годишна ТВ-презентерка за генерален конзул во Тотова, САД, како и за одлуката за испраќање конзул во Чикаго.
Милошоски го кани министерот за надворешни работи Бујар Османи да ја презентира целосната писмена документација во врска со именувањето на актуелните генерални конзули (предлозите од МНР, одлуките на Владата, биографии, сертификати и друга документација). Милошоски смета дека поради актуелноста на ова прашање, би било добро седницата на комисијата да се одржи до 2 март.
„Дипломатијата, за жал, често именува дипломати врз основа на личен клиентелизам, наместо врз основа на стручност. Последните примери со генералните конзули во Чикаго и Њујорк се доказ дека одредени кадровски решенија се носеле зад завесата ‘затворена владина седница’, иако не ги исполнувале предвидените законски услови. Затоа Османи треба да даде отчет пред пратениците како претставници на граѓаните“,
напиша Милошоски на Фејсбук.
Министерот Османи моментно е во Минхен како член на владината делегација на 58. безбедносна конференција. Пред дваесетина дена, тој „гостуваше“ во собраниска комисија за надворешни работи откако ја прифати поканата од Милошоски да реферира пред пратениците за односите со Софија.
Од друга страна, Османи во повеќе наврати во изминатите две и пол години апелира до Милошоски да не го опструира испраќањето на новите амбасадори, кои во собраниската Комисија за надворешна политика треба да ги одбранат тезите пред заминувањето во мисиите. Овој проблем се провлекува уште од периодот на претходната Влада, како и во периодот кога на чело на дипломатијата беше Никола Димитров.