„Во текот на вчерашниот ден е направен вонреден хигиенски епидемиолошки надзор од страна на екипи од Центарот за јавно здравје, Институтот за јавно здравје, Државниот санитарен и здравствен инспекторат и од Агенцијата за храна во касарната ‘Гоце Делчев’ каде што се наоѓа Воената академија, и од страна на Воено медицинскиот центар во касарната ‘Боро Менков’ во Куманово, каде што исто така четири лица се пожалиле на стомачни тегоби, при што се земени контролни примероци за испитување“, информираат од Министерството за одбрана
Питомци од Воената академија „Генерал Михаило Апостолски“ со симптоми на мачнина и повраќање побарале лекарска помош на Инфективната клиника во Скопје, информираат од Министерството за одбрана.
Оттаму, преку соопштение испратено до медиумите, посочија дека вчера во раните утрински часови 20 питомци и двајца офицери на Центарот за обука на питомци се пожалиле на мачнина проследена со повраќање.
„Најнапред тројца питомци се пожалиле на мачнина проследена со повраќање по што итно биле пренесени на Инфективната клиника при Клиничкиот центар ‘Мајка Тереза’, каде што од страна на дежурниот доктор биле прегледани и двајца биле вратени назад во единица без конкретна дијагноза, а еден питомец е хоспитализиран и тој се очекува во текот на денешниот ден да биде вратен во единицата. Подоцна уште седумнаесет питомци и двајца офицери се пожалиле со истите симптоми, по што сите биле однесени на Инфективната клиника, каде што биле третирани од страна на медицинскиот персонал и откако им била констатирана стабилна состојба биле пуштени назад во единицата“,
се вели во соопштението на Министерството за одбрана.
Од страна на Министерството за здравство било побарано Воено-медицинскиот центар заедно со инспекторите од Центарот за јавно здравје и од Агенцијата за храна и ветерина да истражат на што се должи овој случај.
„Во текот на вчерашниот ден е направен вонреден хигиенски епидемиолошки надзор од страна на екипи од Центарот за јавно здравје, Институтот за јавно здравје, Државниот санитарен и здравствен инспекторат и од Агенцијата за храна во касарната ‘Гоце Делчев’ каде што се наоѓа Воената академија, и од страна на Воено медицинскиот центар во касарната ‘Боро Менков’ во Куманово, каде што исто така четири лица се пожалиле на стомачни тегоби, при што се земени контролни примероци за испитување. Целта на овие вонредни надзори е намалат или целосно да се отстранат сите ризици кои може да се одразат по здравјето на луѓето. По добиените резултати од испитувањата кои ги очекуваме во текот на денешниот ден, ќе се преземат натамошни чекори согласно препораките на надлежните институции“,
додаваат од Министерството за одбрана.
Директорот на Клиниката за инфективни болести Фадил Цана во изјава за МИА потврдил дека 10 лица побарале лекарска помош и сите имале лесни симптоми, освен едно лице кое е задржано на лекување, но е во добра здравствена состојба. Другите по укажаната медицинска помош се вратени во Академијата.