Едниот протест насловен „Марш на ангелите“, закажан околу пладне, како што стои во известувањето испратено до кочанската полицијата, е во организација на семејствата на починатите, додека другиот под назив „Ваш профит – наши животи“, според најавата, треба да почне во 15:59 часот, но не е познат неговиот организатор
Два одделни граѓански протести се најавени за денеска во Кочани во врска со трагедијата во т.н. кабаре „Пулс“, во која животите ги загубија 60 лица, а речиси 200 се повредени.
Протестот кој е најавен за во 12 часот и 5 минути, под назив „Марш на ангелите“, како што стои во известувањето за маршот доставен до кочанската полиција, го организираат семејствата на починатите во трагичниот пожар.
„Согласно правилата за организирање марш уредно ве известуваме дека се организира и ќе се реализира мирен ‘Марш за ангелите’“’ за потсетување на институциите дека семејствата ќе ја бараат правдата за нивните покојни деца сè до последен здив и дека ќе бараат брза и непрсистрасна истрага и судска постапка“, се вели во известувањето.
Како собирно место од каде ќе започне маршот е наведен Паркот на револуцијата, по што рутата потоа ќе се продолжи кон Трговскиот центар во градот, а оттаму кон зградата на Општина Кочани, Полициската станица и Основниот суд и Основното јавно обвинителство во Кочани.
Во писменото известување за маршот организаторите нагласуваат дека тој е организиран исклучиво од семејствата на починатите во трагедијата и не е за лицата од обезбедувањето на т.н. кабаре и граѓаните кои не го прифаќаат таквото укажување не мора да се приклучуваат.
Инаку, како што пренесоа дел од медиумите, вчера, а и вопретходните денови, извесен број кочанчани одржаа мирен протестен марш барајќи правда за обезбедувачите во т.н. кабаре, а кои се меѓу осомничените во истрагата пожарот, бидејќи, според организаторите, спасиле многу живот кобната ноќ.
Другиот протестен марш под назив „Ваш профит – наши животи“ е закажан за денеска во 15 часот и 59 минути и ќе има слична маршрута до институциите како и претходниот. Притоа, во најавата што беше објавена на социјалните мрежи, не е наведено кој го организира овој протест.
Вчера од Министерството за здравство соопштија дека 29-годишниот Александар Карадаковски, управител на т.н. кабаре „Пулс“, кој беше на лекување во Литванија, е 60-та жртва на катастрофалниот пожар.
Споделувајќи информации што ги добиле од лекарите во Литванија, директорот на болницата „Св. Наум Охридски“, Небојша Настов, на прес-конференцијата со министерот за здравство Арбен Таравари соопшти дека Карадаковски починал како резултат на директното оштетување на голем дел од дишното стебло од речиси 90 проценти, поради вдишениот чад, што резултирало со смрт. Дополнително, како што посочија Настов и Таравари, Карадаковски имал 36 отсто изгореници по телото, главно кај главата, вратот и горните екстремитети. Овие изгореници предизвикале рани и инфекции, а на 1 април на Карадаковски му откажале и бубрезите, поради што бил ставен на дијализа.
Телото на Карадаковски ќе биде транспортирано во Македонија, а обдукцијата на телото ќе биде извршена во Судска медицина во Скопје, соопшти министерот на здравство.
Инаку, тој беше еден од 27-те осомничени физички лица во истрагата за пожарот што ја отвори Основното јавно обвинителство во Кочани, но постапката за него ќе биде прекината, информираа вчера од Јавното обвинителство.