Министерот најавува дека одлуката што работната група ќе смета дека треба да се примени, наредната недела ќе биде доставена до Владата за да се усвои, а веднаш потоа ќе почне нејзината примена
Овошје, зeленчук, ориз, грав, месо се дел од производите што ќе се најдат во есенската потрошувачка кошничка што Министерството за економија и труд најави дека ќе ја има како мерка за помош на стандардот на граѓаните.
Министерот за економија и труд Бесар Дурмиши вели дека висината на цените на овие производи ќе зависи од тоа дали Работната група што е формирана за изработка на оваа кошничка ќе смета дека треба да има ограничување на цените на одредено ниво или, пак, маржата да биде ограничена од 5, 10 или 15 отсто.
„Министерството за економија и труд заедно со министерствата за земјоделство, шумарство и водостопанство и со финансии формираа работна група која до утре треба да направи есенска потрошувачка кошничка. Таа кошничка ќе опфати околу 100 основни прехранбени и земјоделски производи. Работната група ќе направи една симулација за ограничување на цените на одредено ниво или за ограничување на маржата од 5, 10 или 15 отсто“,
рече Дурмиши денеска при неговата посета на книжарници во Скопје.
Тој најави дека одлуката што работната група ќе смета дека треба да се примени, наредната недела ќе биде доставена до Владата за да се усвои.
„Кога ова ќе помине на Влада, веднаш ќе ја почнеме процедурата да се почитува таа мерка“,
рече Дурмиши.
Мерката за воведувањето на есенска кошничка вчера ја најави и премиерот Христијан Мицкоски, кој рече дека таа ќе биде продолжена и за новогодишните, велигденските, рамазанските празници.
Во однос на Законот за нефер трговски практики, министерот Дурмиши најави дека на крајот на овој месец ќе стапи во сила.
„Фирмите имаа шест месеци рок да ги усогласат своите цени“,
рече тој.
Законот за забрана на нефер трговски практики се донесе во март. Со него се очекува намалување на цените на прехранбените производи.