Дурмиши: Доколку не ги донесовме мерките, цените на храната ќе се зголемуваа

„Законот за нефер трговски практики е во сила, резервите што ги имаат маркетите ќе се продаваат по стари цени. Кога ќе се направат новите фактури, добавувачите со купувачите треба да ги усогласат цените и новите производи ќе бидат со пониски цени“, вели министерот

Дурмиши вели дека со есенската кошничка и со Законот за нефер трговски практики заштеда во пари за едно четиричлено семејство, на месечно ниво, би изнесувала од 690 ден до 1 360 денари по семејство, во зависност од начинот на исхрана, како и од изборот на маркети каде што се набавува

Министерот за економија и труд Бесар Дурмиши смета дека цените на основните прехранбени производи ќе биле многу повисоки доколку не била донесена есенската потрошувачка кошничка, односно одлуката за ограничување на бруто-профитната маржа.

Тој вели дека со есенската кошничка и мерката „Помалку трошоци – повеќе за тебе“ и инфлацијата е на стабилно ниво.

„Да не беа овие одлуки, цените ќе имаа уште поголем раст. Според информациите што ги имаме, сега инфлацијата е 2,6 отсто, што е стабилно ниво. Ако не беа овие одлуки, и инфлацијата ќе беше поголема и ќе имавме раст на основните прехранбени производи“,

рече Дурмиши денеска одговарајќи на новинарски прашања на прес-конференцијата по повод 100 дена Влада.

Во однос на Законот за нефер трговски практики, кој стапи во сила на крајот на минатиот месец, Дурмиши рече дека бенефитите од него ќе ги има кога трговците ќе ги потрошат резервите.

„Законот за нефер трговски практики е во сила, резервите што ги имаат маркетите ќе се продаваат по стари цени. Кога ќе се направат новите фактури, добавувачите со купувачите треба да ги усогласат цените и новите производи ќе бидат со пониски цени“,

рече Дурмиши.

Граѓаните ќе полнат есенска, предновогодишна и пролетна кошничка – ќе се намалуваат цените на производите што најмногу се трошат

Прашан за тоа кога граѓаните ќе знаат дека трговецот ги потрошил резервите за да очекуваат пониски цени и кога тие ќе може да пријават доколку не се почитува законот, Дурмиши рече дека на крајот на овој и почетокот на идниот месец влијанието веќе ќе го има и цените ќе бидат намалени.

Според него, овие три месеци е преоден рок што е во рамки на Законот. Потоа рече дека Комисијата за заштита на конкуренцијата, чија реорганизација е во процедура, ќе биде на терен и ќе ги видат тие фирми или продавници што не го почитуваат законот и ќе пишуваат казни.

„Овие три месеци додека да се усогласат цените ќе пишуваат опомени и ќе им даваат совети на фирмите како да го почитуваат законот“,

додаде Дурмиши.

Од денес стапи во сила Законот за нефер трговија, се очекува намалување на производите

Тој рече дека нема информација оти трговците, откако е во сила Законот за нефер трговски практики, имаат најдено „дупка“ за да ги изигруваат договорите и додаде дека Комисијата, кога ќе излезе на терен, доколку забележи дека има вакви неправилности од трговците, нормално дека според Законот ќе постапи и ќе пишува казни.

Дурмиши најави и дека во четврток ќе биде потпишана спогодба на Економско-социјалниот совет од страна на владата, синдикатите и работодавачите.

„Таа ќе биде потпишана во четврток и сите нивни барања, предлози, критики ќе се отвораат на маса, ќе се разговараат и транспарентно ќе се носат одлуки. Ќе ги видиме можностите на владата во рамки на законот, ќе ги слушнеме и работодавачите и синдикатите. Сите засегнати страни ќе ги слушнеме. Во четврток ќе биде првата седница и ќе донесеме една заедничка одлука“,

рече Дурмиши.

Владата на 20 септември донесе одлука за ограничување на бруто-профитната маржа на дел од основните прехранбени производи за 10 отсто во трговијата на мало и на големо и таа ќе важи до 31 октомври.

Се ограничува маржата на 73 прехранбени производи, меѓу нив и на ѓеврекот, бурекот и баничките

На листата на т.н. есенска кошничка се 73 производи меѓу кои – леб, тестенини, брашно, пекарски производи како бурек и банички со месо и сирење, млеко и млечни производи, месо и преработки од месо, дел од овошјето и зеленчукот, ориз, грав, масло за јадење и дел од конзервираните производи.

Во отчетот што го даде Дурмиши за изминатите 100 дена, рече дека според првичните анализи од терен што ги има, цените на производите од есенската кошничка се намалиле во просек од 5 до 10 отсто, при што кај некои производи намалувањето на цените е помало, или воопшто и го нема како кај лебот, маслото за јадење и млекото, додека кај други производи истото е значително поголемо, односно кај месото, зеленчукот, сирењето и кашкавалот.

„Се очекува намалувањето на цените да биде уште поголемо имајќи го во предвид и намалувањето на цените во трговијата на големо, кое допрва треба да се случи во наредните пратки, при достава на производите во маркетите. Искажано во заштеда во пари за едно четиричлено семејство, на месечно ниво заштедата би изнесувала од 690 ден до 1 360 денари по семејство, во зависност од начинот на исхрана, како и од изборот на маркети каде што се набавува“,

додаде Дурмиши.