Партијата што ја води Али Ахмети забележува дека во делегацијата на државата, која отпатува на самитот на НАТО, немало место „ниту за ‘џентлменскиот’ вицепремиер, а камоли за некој министер“
Опозициската партија ДУИ преку партиско соопштение изрази загриженост дека коалицијата ВЛЕН уништувала сѐ што е постигнато две децении по ред.
„Со ДУИ во Владата, Република Северна Македонија беше претставувана не само на НАТО и другите меѓународни самити, туку и во највисоките институции на САД, претставена од албанскиот премиер, првиот вицепремиер и албанските министри. Нашата земја денеска за прв пат е претставена од моноетничка делегација на Самитот на НАТО во Вашингтон, САД. Моноетничката делегација од моноетничката Влада е дополнителен доказ дека вазалите на ВЛЕН се множат со нула како резултат на немањето изборен и етнички легитимитет“,
се вели во соопштението на ДУИ која потенцира дека коалицијата ВЛЕН ги загубила изборите и ги понижува Албанците.
Партијата што ја води Али Ахмети забележува дека во делегацијата на државата, која отпатува на самитот на НАТО, немало место „ниту за ‘џентлменскиот’ вицепремиер, а камоли за некој министер“.
Според ДУИ, присуството на пратениците во Парламентарното собрание на НАТО, а не на самитот, не го покривал срамот од понижувачката улога без достоинство на Албанците во државата.
ДУИ реагира дека ова претставува систематски обид да се тргнат Албанците од учеството во претставувањето на земјата во интегративните процеси, во кои порано протагонист била партијата на Ахмети.