Оттаму сметаат дека е дегутантен молкот на албанскиот партнер во Владата, коалицијата „Вреди“, за кои велат дека и досега за ништо не биле прашувани
Од Демократската унија за интеграција (ДУИ) велат дека на земјата ѝ е потребен суштински политички дијалог, но не на интимни полноќни средби, туку во пристоен политички формат, со јасно изразена репрезентативност на сите граѓани и во кој ќе се отворат суштинските прашања од значење за земјата.
Реакцијата на ДУИ доаѓа по изјавите на премиерот Христијан Мицкоски оти стои на располагање во секое време, ако треба на полноќ или по полноќ, да го сослуша планот на лидерот на СДСМ, Венко Филипче, и да видат дали по тој план нешто може да се реши.
Од ДУИ, преку соопштение што е објавено и на нивната фејсбук-страница, изразуваат загриженост поради, како што велат, сѐ понагласената моноетничка доминација која власта ја демонстрираше во првата година од своето владеење, а сега веќе на јавна сцена ја вклучува и етничката македонска опозиција во својата намера.
„Јавноста е просто згрозена од овој јавен флерт на Мицкоски и Филипче, за полноќни средби во политички интимна атмосфера на која ништо помалку туку ќе се крои планот за нов општествен договор за регулација на идните политички текови“,
велат од ДУИ.
Оттаму сметаат дека е дегутантен молкот на албанскиот партнер во Владата, коалицијата „Вреди“, за кои велат дека и досега за ништо не биле прашувани.
Од ДУИ велат дека земјава претставува препознатлив модел на функционална мултиетничка демократија со јасно изразена евроатлантска ориентација.
„Овој систем на вредности е внимателно вткаен во трите темелни документи на земјата како што се Охридскиот рамковен договор, Преспанскиот договор и Договорот за пријателство со Република Бугарија, зад чие спроведување како гаранција стојат нашите стратешки партнери ЕУ и САД“,
додаваат од ДУИ.
Според ДУИ, основниот модел на мултиетничкиот карактер на земјата е системски загрозен, а загрозен е и интегративниот процес на земјата во Европската Унија.
Тоа, додаваат од партијата, се две клучни стратешки основи коишто сериозно ја загрозуваат долгорочната стабилност и просперитет на земјата, и тоа се двата приоритети за кои треба да се отвори суштински политички дијалог.