Едно лице, кое било примено во домот на 18 март, на 4 април е дијагностицирано со ковид-19
Целосно е завршена епидемиолошката анализа во старскиот дом „Сју рајдер“ во Битола и одреден е сет од 12 мерки кои треба да ги преземе оваа институција откако лице кое било примено таму е дијагностицирано со коронавирус.
Како што соопшти директорката на ДСЗИ, Иринка Бухова, меѓу 12 мерки се: изолација на луѓето кои биле во контакт со него, дезинфекција на просторот, немешање на персоналот од овој оддел со останатите и други. Направен е и контролен надзор и констатирано е дека тие се почитуваат.
За тоа како дошло до зараза на ова лице со коронавирус, Бухова објасни дека тој на 9 март имал контакт со внука која дошла од ризична земја, а на 18 март бил примен во домот „Сју рајдер“.
Првите симптоми се појавиле кај него на 2 април, по што бил тестиран, а резултатите од 4 април покажале дека е позитивен на коронавирус, по што е сместен на инфективното одделение во битолската болница. Бухова кажа дека тој е во добра општа состојба.
За случајот вчера информираше министерот за здравство Венко Филипче.