За измени на Уставот на Франција, потребна е согласност од двата дома на француското национално собрание, Сенатот – Горниот дом, и Долниот дом – парламентот, а потоа и референдум
Долниот дом на францускиот парламент синоќа усвои закон според кој правото на абортус ќе биде вклучено во Уставот на земјата, јавуваат агенциите.
Законот го поддржале 337 пратеници кои гласале „за“, а „против“ биле 32 пратеници во Долниот дом на францускиот парламент кој брои 557 пратеници.
За измени на Уставот на Франција е потребна согласност од двата дома на француското национално собрание, Сенатот – Горниот дом и Долниот дом – парламентот, а потоа и референдум.
Авторите на предлогот кои доаѓаат од левата коалиција тврдат дека целта на измените на Уставот е „да се заштити и гарантира основното право на доброволно прекинување на бременоста“.
Абортусот беше декриминализиран во Франција со закон од 1975 година, но не постои одредба во Уставот што го гарантира ова право.
Министерот за правда Ерик Дупон-Морети рече дека центристичката влада на Франција ја поддржува иницијативата за измена на Уставот.
Тој ја спомна одлуката на Врховниот суд на САД од јуни, годинава која го елиминираше федералното уставно право на абортус и надлежноста за одлучување околу ова прашање им ја остави на сојузните држави.„
„Правото на абортус што мислевме дека е стекнато 50 години (во САД), во реалноста воопшто не е стекнато“,
рече министерот за правда на Франција.
Неодамнешната анкета покажа дека над 80 отсто од Французите го поддржуваат правото на абортус и дека мнозинството граѓани се за внесување на ова право во Уставот.
Центристичката алијанса на францускиот претседател Емануел Макрон, Ренесанса, вчера одлучи да повлече сличен предлог за кој требаше да се расправа во Националното собрание во понеделник. Наместо тоа, пратениците од редовите на центристите и на левицата се согласија да го поддржат предлог-законот кој вели дека „законот гарантира ефективен и еднаков пристап до правото на доброволно прекинување на бременоста“.