Против неа, како и против двајца гинеколози од битолската болница, од кои едниот е нејзин сопруг, е поднесена кривична пријава до Основното јавно обвинителство (ОЈО) – Битола
Докторка од Белград, Србија, која нема соодветна лиценца за работа од Лекарската комора во земјава, правела царски рез во Клиничката болница во Битола, соопшти Министерството за внатрешни работи (МВР).
Докторката е сопруга на 33-годишен гинеколог во битолската болница.
Тој заедно со негов колега гинеколог, 60-годишен битолчанец, ги пречекориле своите овластувања и ѝ овозможиле на докторката од Белград да изврши породување со царски рез во операционата сала на Одделението за гинекологија и акушерство во битолската болница.
Оперативниот зафат се случил на 1 јануари годинава.
„По завршувањето на интервенцијата, првопријавениот во оперативниот дневник внел невистинит податок, односно во графата податоци за оператор, ги внел своите податоци и податоците на второпријавениот, а од стариот оперативен дневник отстранил страници на кои третопријавената ги запишала извршените оперативни интервенции на 01.01.2021 година“,
велат од МВР.
Двајцата гинеколози од Битола се пријавени за делото злоупотреба на службената положба и овластување, додека сопругот на докторката од Србија е осомничени за фалсификување службена исправа. Српската лекарка, пак, е пријавена за надрилекарство и за непостапување според здравствените прописи за време на епидемија.