Дојави за бомби во 15 скопски училишта – дел од дојавите се лажни, во дел од школите проверките сè уште траат

Од МВР посочија дека во дел од училиштата во овој момент се завршени проверките од полициските екипи, при што е утврдено дека дојавите за бомби се лажни. Во останатите училишта, пак, проверките се сè уште во тек

Откако Министерството за внатрешни работи (МВР) првично информира дека попладнево четири скопски училишта на своите мејл адреси добиле дојави за поставени бомби, оттаму дополнително информираат дека досега заканувачки дојави стигнале до вкупно 15 училишта во главниот град. Се работи за 13 средни и две основни училишта.

„Веднаш по добиените пријави, од полициски службеници се преземени мерки за безбедно евакуирање на објектите и во тек се антитерористички проверки и се преземаат мерки за расчистување на случаите“,

велат од МВР.

Од Министерството посочија дека во дел од училиштата во овој момент се завршени проверките од полициските екипи, при што е утврдено дека дојавите за бомби се лажни. Во останатите училишта, пак, проверките се сè уште во тек.

Нови дојави за бомби во школи во Скопје: Учениците евакуирани

Премиерот Димитар Ковачевски најави дека денеска ќе има координативен состанок на безбедносните служби на кој ќе се разговара за актуелната состојба со лажните дојави за бомби како и за преземање мерки со цел сите граѓани на државата да бидат заштитени.

Денеска на состанок на безбедносните служби ќе се разгледува актуелната состојба со лажните дојави за бомби, најави Ковачевски