„Неопходен предуслов за успех во проширувањето (на ЕУ) е почитување на владеењето на правото и правата на малцинствата и универзалното, а не селективно, почитување на меѓународното право. Конкретно за Договорот од Преспа повторувам дека како меѓународен договор има задолжителен карактер, ги обврзува страните и создава обврски што треба во потполност да се почитуваат“, рекол Герапетритис по денешната средба со неговиот француски колега
Шефот на грчката дипломатија, Јоргос Герапетритис денеска уште еднаш го повторил ставот дека Договорот од Преспа е меѓународен договор кој предвидува обврски што во потполност треба да се почитуваат.
Герапетритис пораката на Атина ја кажал по средбата со неговиот француски колега, Стефан Сежурне, јави дописничката на МИА од главниот град на Грција.
Иднината на Европа, која е директно поврзана и со проширувањето била и една од темите на која шефот на грчката дипломатија разговарал со Сежурне, рекол тој по средбата.
Во таа насока Герапетритис изјавил дека повеќе од 20 години по Солнската агенда Грција и Франција остануваат силни поддржувачи на проширувањето на Европската Унија со земјите од Западен Балкан, но за тоа, како што посочил, постојат неопходни предуслови што треба да се исполнат.
„Неопходен предуслов за успех во проширувањето е почитување на владеењето на правото и правата на малцинствата и универзалното, а не селективно, почитување на меѓународното право. Конкретно за Договорот од Преспа повторувам дека како меѓународен договор има задолжителен карактер, ги обврзува страните и создава обврски што треба во потполност да се почитуваат“,
рекол Герапетритис.
Веќе неколку пати досега, Герапетритис посочи дека одлуката на раководството на Северна Македонија да не го користи уставното име Северна Македонија на домашната сцена е флагрантно кршење на Преспанскиот договор.
Премиерот Христијан Мицкоски во досегашните јавни настапи не го користи уставното име на државата, исто како и претседателката Гордана Сиљановска-Давкова, нагласувајќи дека негово човеково право е да ја нарекува државата како сака, што предизвика остри реакции од Грција и од стратешките партнери на државата, ЕУ и САД, да се почитува Преспанскиот договор.
Неодамна уставното име на државата – Република Северна Македонија, давајќи изјави за медиумите, го употребија министрите за образование и за земјоделство шумарство и водостопанство, Весна Јаневска, односно Цветан Трипуновски.
Инаку, според извори од Министерството за надворешни работи и надворешна трговија, во следните неколку недели ќе се прави модификација и на составот на заедничката комисија со Грција, чие формирање беше предвидено со Договорот од Преспа.
Оттаму информираат дека на претстојното Генерално собрание на Обединетите нации, кое ќе се одржи следната недела во Њујорк, предвидена е билатерална средба меѓу шефовите на дипломатите на Северна Македонија и на Грција, односно меѓу Тимчо Муцунски и Јоргос Герапетритис.
Извори од МНР велат и дека шефот на дипломатијата и премиерот оваа недела во Брисел ќе имаат средби со лидери од регионот, но ќе остварат и билатерални средби со високи претставници на ЕУ, на кои ќе ги презентираат „нашите клучни аргументи од гледна точка на стратешка определба на Владата“.
Инаку, Владата минатата недела го смени составот на Комисијата за историски прашања со Бугарија.