Лидерот на ВМРО-ДПМНЕ за предлогот за намалување на бројот на пратеници и една изборна единица зборуваше синоќа во интервјуто „360 степени“. Со вакви промени, смета Мицкоски, ќе се намали бројот на привилегирани пратеници, а со тоа и фрустрацијата на граѓаните. На прашањето – дали овој предлог е искрен, со оглед дека партијата досега се залагаше за мнозински изборен модел, Мицкоски рече дека тој предлог не ја добил поддршката од другите политички партии, па поради тоа и тие се откажале од таа идеја
Демократскиот сојуз (ДС) предводен од Павле Трајанов и претседателот на ЛДП, Горан Милевски го поздравија синоќешниот предлог на лидерот на ВМРО-ДПМНЕ за намалување на бројот на пратеници во парламентот од 120 на 90, како и тоа што сега за опозициската партија е прифатливо воведување една изборна единица.
„Демократскиот сојуз оценува дека е добро тоа што покрај СДСМ, сега и ВМРО-ДПМНЕ се залага за демократизација на изборниот процес, за една изборна единица,како и за намалување на бројот на пратеници. Полека се гради консензус околу реформа на изборниот процес во целина и очекуваме тоа да се случи со темелни промени на Изборниот законик, за да се обезбедат рамноправни услови и демократски правила за изборен натпревар на сите политички партии. Бараме за измените на Изборниот законик најитно да се закаже расправа во Парламентот и да се донесат промените“,
велат од ДС потсетувајќи дека тие долг период се залагаат за вакви изборни реформи и дека истите се дел од нивната изборна програма неколку изборни циклуси наназад.
Покрај ова, од ДС нагласуваат дека бараат реформи и на изборните правила потенцирајќи го привилегирањето на четирите најголеми партии.
„Тие располагаат со 90 отсто од медиумското време во изборната кампања, како и со најмногу средства од буџетот од кој се финансираат и нивните партиски институти. За менување на овие одредби, Демократскиот сојуз поднесе иницијатива до Уставниот суд за преиспитување на уставноста на ваквите одредби од Изборниот законик кои ги доведуваат во нерамноправна положба сите други политички партии“,
додаваат од ДС.
И претседателот на ЛДП, Горан Милевски, потсетува дека неговата партија уште во 2010 ја промовирала идејата за намалување на бројот на пратеници на 90. Сепак, вели тој, добро е што и другите партии конечно се свесни дека ни се потребни мали и ефикасни институции.
„Предлогот на Мицкоски даден при вчерашното негово гостување во емисијата ’360 степени‘ на Алсат ТВ, е копија на предлогот на ЛДП кој е даден уште пред 12 години. Ние знаеме дека идеите на ЛДП во моментот на предлагање се неразбирливи и неприфатливи, но добро е да се знае дека сме пред времето со нашите ставови. Се радуваме што и другите политички чинители конечно разбираат дека на македонската држава и требаат мали и ефикасни институции“,
вели Милевски.
Лидерот на ВМРО-ДПМНЕ за предлогот за намалување на бројот на пратеници и една изборна единица зборуваше синоќа во интервјуто „360 степени“. Со вакви промени, смета Мицкоски, ќе се намали бројот на привилегирани пратеници, а со тоа и фрустрацијата на граѓаните.
„Сакаме да предложиме концепт за намалување на бројот на пратеници во парламентот од 120 на 90, слично како словенечкиот концепт, како и воведување на една изборна единица. Овој гломазен систем од 120 пратеници е преголем, тој делува премногу фрустрирачки за граѓаните, преголеми се трошоците, преголема е и акумулираната моќ. Со намалување на бројот на пратеници на 90, ќе се намали и бројот на привелигирани пратеници. Ние сме и за воведување на една изборна единица, бидејќи имаше и други политички партии кои го поддржуваат тој концепт. Подготвени сме за овој концепт“,
рече Мицкоски.
На прашањето – дали овој предлог на ВМРО-ДПМНЕ е искрен, со оглед дека партијата досега се залагаше за мнозински изборен модел, Мицкоски рече дека тој предлог не ја добил поддршката од другите политички партии, па поради тоа и тие се откажале од таа идеја.