Според Министерството за здравство, со оваа мерка ќе се намалат пропуштените прегледи и ќе се оптимизира функционирањето на здравствениот систем
За ваквата новина што ја воведуваат од министерството, денеска матичните лекари рекоа дека еден час ќе штрајкуваат затоа што не се согласуваат со овие наредби
Пациентите при посета на матичен лекар ќе треба да го верификуваат својот телефонски број во системот „Мој термин“ за да може докторите понатаму да го извршат прегледот и да издадат упат.
Оваа мерка, како што велат од Министерството за здравство, има за цел да овозможи пациентите навремено да добиваат известувања за закажани термини и други здравствени услуги.
Според Здравство, со тоа ќе се намалат пропуштените прегледи и ќе се оптимизира функционирањето на здравствениот систем.
Во моментов, процесот сè уште не е задолжителен, но, во наредниот период ќе стане обврска при посета кај матичниот лекар.
Сепак, од Здравство велат дека системот предвидува исклучоци во одредени случаи, односно кога станува збор за итни медицински случаи, децата и изнемоштените лица можат да бидат верификувани преку друго лице – еден телефонски број за повеќе пациенти.
Корисниците на мобилната апликација „Мое здравје“ од министерството велат дека можат самостојно да ја завршат верификацијата, без вклучување на матичниот лекар.
„Важно е да се нагласи дека верификацијата се прави еднократно, што значи дека пациентите треба да го потврдат својот телефонски број само при првиот преглед. Оваа промена се базира на анализи што покажаа дека значителен број пациенти не се појавуваат на закажаните термини поради неажурирани телефонски броеви. На пример, повеќе од 50 проценти од пациентките со закажани прегледи за дојка не се појавиле, со што биле изгубени термини што можеле да бидат искористени за други пациенти“, велат од Министерството за здравство.
За ваквата новина што ја воведуваат од министерството, денеска матичните лекари рекоа дека еден час ќе штрајкуваат затоа што не се согласуваат со овие наредби. Од Здружението на приватни матични лекари рекоа дека денеска превентивно ќе запрат со работата додека системот не се врати на старо. Тие велат оти доктор треба да лекува, а не да изигрува администратор.