ДКСК бара одговорност од Спасовски зашто се криеле неправилностите утврдени за станицата за технички преглед во која поминал автобусот на „Беса транс“

Овој случај го отвори „360 степени“. Како што претходно објавивме, решението за привремена забрана за работа на станицата било издадено од МВР на 26 ноември 2021 година, а поради констатирани пропусти во работењето. На документот стои потписот на министерот Оливер Спасовски. Но, сознанијата до кои дојде „360 степени“ открија дека пропустите во станицата биле утврдени три и пол месеци претходно, уште во август 2021

Државната комисија за спречување корупција (ДКСК) одлучи да достави иницијатива до Владата за утврдување одговорност на министерот за внатрешни работи Оливер Спасовски бидејќи ненавремено донел решение за забрана за вршење технички преглед на правното лице „Виа комерц“, станица во која по утврдувањето на неправилностите, технички преглед бил извршен и на превозникот „Беса транс“ во чиј автобус во несреќа во Бугарија загинаа 45 македонски граѓани, а седум беа повредени.

Овој случај го отвори „360 степени“. Како што претходно објавивме, решението за привремена забрана за работа на станицата било изречено од МВР на 26 ноември 2021 година, а поради констатирани пропусти во работењето. На документот стои потписот на министерот Оливер Спасовски. Но, сознанијата до кои дојде „360 степени“ открија дека пропустите во станицата биле утврдени три и пол месеци претходно, уште во август 2021.

(ВИДЕО) Спасовски ја затворил станицата во која е регистриран автобусот на „Беса транс“ три дена по трагедијата, но за пропусти откриени уште во август

Комисијата за спречување корупција утврдила дека министерот не постапил правилно, бидејќи по добиениот извештај од инспекторатот кој извршил контрола и утврдил неправилности во работењето на станицата, тој не издал наредба во предвидениот рок од станицата да ги отстранат неправилностите туку истата ја издал по три месеци од добиениот извештај, односно три дена по несреќата во Бугарија.

ДКСК одлучи дека поради фактот што Јавно обвинителство веќе има отворено предмет и се води судски процес за овој случај, сите докази што ги имаат ќе ги достават како дополнување на докази во обвинителството, а до Владата да достават иницијатива за утврдување на одговорност на министерот Оливер Спасовски.

Оттаму посочија дека сè уште не е утврдено дека сообраќајната несреќа се случила поради техничка неисправност на автобусот.