При поминувањето на границата, додаваат од МВР, не била извршена контрола на патниците и возилата, а во одреден временски интервал сите ленти за излез од државата биле затворени
Против шест полициски службеници е поведена дисциплинска постапка за случајот кога делегацијата предводена од претседателот на Собранието Африм Гаши на 17 август годинава помина на граничниот премин „Блаце“, информираа денеска од Министерството за внатрешни работи (МВР).
Од МВР велат дека поведувањето постапка за утврдување дисциплинска одговорност против полицајците Н.Р., М.С., А.Б., Б.А, Н.Б. и Б.С. е по извршениот увид во службените материјали, по анализата на видеонадзорот и од разговорите со полициските службеници.
„Откако делегацијата, во која како носител се јавува претседателот на Собранието, ја поминува државната граница на граничниот премин ‘Долно Блаце’ на лентата за излез број 1, по неа поминуваат шест цивилни возила, кои во меѓупросторот на граничните премини ѝ се приклучуваат на делегацијата“,
се наведува во соопштението од МВР.
При поминувањето на границата, додаваат од МВР, не била извршена контрола на патниците и возилата, а во одреден временски интервал сите ленти за излез од државата биле затворени. Во тој период од страна на Н.Б., кој е полициски службеник од обезбедувањето на претседателот на Собранието и Б.А., полициски службеник од полициската станица за „Долно Блаце“, едно возило што се наоѓало во третата лента за излез било извлечено и насочено кон првата лента каде што ја поминало границата без да се изврши контрола на патниците и возилото.
„Утврдено е дека Н.Б. наместо да врши непосредно физичко обезбедување на претседателот на Собранието, врши дејствија на граничниот премин кај кабините за излез и царинските кабини, со кои овозможува цивилни возила да се приклучат кон делегацијата, како и да се даде приоритет цивилно возило да ја помине државната граница“,
се додава во полициското соопштение.
Со наведените дејствија Н.Б. и Б.А., како што велат од МВР, сториле потешко кршење на работниот ред и дисциплина предвидени во Законот за внатрешни работи и од Колективниот договор на МВР.
Од МВР велат дека наместо да бидат преземени соодветни мерки за утврдување неправилности во овој случај, од страна на главниот инспектор М.С. во содејство со началникот на Регионалниот центар за гранични работи „Север“ Н.Р., согласно дотогашните констатирани пропусти, не биле преземени соодветни мерки, туку бил испратен акт со кој се задолжува командирот на полициската станица за „Долно Блаце“ да го доиспита целосно случајот и да преземе соодветни мерки.
На овој начин, и М.С. и Н.Р сториле потешко кршење на работниот ред и дисциплина предвидени во Законот за внатрешни работи и од Колективниот договор на МВР.
Во соопштението од МВР е наведено и дека иако патните исправи на лицата кои заедно со претседателот на Собранието биле навремено доставени за да бидат евидентирани, тоа не било сторено.
„Патните исправи на претседателот на Собранието и членовите на неговото семејство, како и другите припадници на МВР кои требало да патуваат во странство, биле навремено доставени до раководителот на смена А.Б. заради соодветно евидентирање, но тоа не е сторено, односно лицата не се евидентирани. Во конкретниот случај А.Б. постапил спротивно од Правилникот за начинот на извршување на граничните проверки и граничен надзор“,
велат од МВР.
Од МВР додаваат и дека Б.С., одговорен за обезбедување во планот што тој го изготвил и од него имал обврска да презема мерки, не е на работа и не бил предвиден да биде на работа за време на поминувањето на делегацијата, при што од самото тоа произлегува дека планот е изготвен површно и несовесно. Со тоа Б.С. сторил потешко кршење на работниот ред и дисциплина предвидени во Законот за внатрешни работи и од Колективниот договор на МВР.
Претседателот на Собранието се најде во фокусот на јавноста откако на социјалните мрежи се појави видео од колона автомобили, меѓу кои и службеното возило на претседателот на парламентот, кој, според тврдењата, како сват заминал по невеста во Косово.